रवि लामिछानेसहित ५ जनालाई अदालत उपस्थित गराइयो

समाचार

गृहपृष्ठ
समाचार
रवि लामिछानेसहित ५ जनालाई अदालत उपस्थित गराइयो

रवि लामिछानेसहित ५ जनालाई अदालत उपस्थित गराइयो

मंगलबार, पुस २, २०८१ ज्योति दैनिक

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेलाई आज ८औं पटक म्याद थपका लागि अदालतमा उपस्थित गराइएको छ । लामिछानेलाई हिरासतमा राख्न पछिल्लो पटक लिएको ५ दिनको म्याद सोमबार सकिएकाले आज उनलाई अदालतमा उपस्थित गराइएको हो ।

लामिछानेविरुद्ध पुस ५ गते जिल्ला अदालत कास्कीमा अभियोगपत्र दायर गर्नेगरी सरकारी वकिल कार्यालयले तयारी गरिरहेको छ। सम्पत्ति शुद्धीकरण मुद्दामा ९० दिन अनुसन्धान गर्न पाउने भएकाले पुस ५ गते उनीविरुद्ध अभियोग पत्र दायर गर्न लागिएको हो।

पूर्वडीआईजी छविलाल जोशी पक्राउ परेको मितिले पुस ५ मा ९० दिन पुग्ने भएकाले लामिछानेलाई पनि जोशी पक्राउ गरेको मितिबाट म्याद मिलाइएको छ। उनलाई प्रहरीले गत कार्तिक २ गते काठमाडौंबाट पक्राउ गरेर पोखरा लगेको थियो । पछिल्लो दुई महिनामा उनलाई कास्की, काठमाडौं, चितवन र पर्सा अदातलमा उपस्थित गराएर अनुसन्धान भइरहेको छ ।

आज कास्की प्रहरीले लामिछानेसहित ५ जनालाई म्याद थपका लागि अदालतमा उपस्थित गराएको हो । सूर्यदर्शन सहकारी ठगीका आरोपितहरु लामिछानेसहित ५१ जनालाई सहकारी ठगी, सङ्गठित अपराध र सम्पत्ति शुद्धीकरणको कसुरमा मुद्दा चलाउन कास्की प्रहरीले जिल्ला सरकारी वकिलको कार्यालयमा रायसहितको प्रतिवेदन पेश गरिसकेको छ ।

सूर्यदर्शन सहकारी ठगीमा प्रतिवादी बनाइएका ५१ जनाबाट १ अर्ब ५१ करोड बीगो मागसहित प्रहरीले प्रतिवेदन तयार गरेको छ ।

प्रकाशित मिति: मंगलबार, पुस २, २०८१ ११:२८