साना–मझौला सङ्गठित संस्थाको धितोपत्र निष्कासन तथा कारोबार नियमावली लागू

समाचार

गृहपृष्ठ
समाचार
साना–मझौला सङ्गठित संस्थाको धितोपत्र निष्कासन तथा कारोबार नियमावली लागू

साना–मझौला सङ्गठित संस्थाको धितोपत्र निष्कासन तथा कारोबार नियमावली लागू

बिहीबार, माघ ३, २०८१ ज्योति दैनिक

काठमाण्डाै । नेपाल धितोपत्र बोर्डले साना तथा मझौला सङ्गठित संस्थाको धितोपत्र निष्कासन तथा कारोबार नियमावली लागू गरेको छ ।

नियमावली अनुसार बढीमा २५ करोड रुपैयाँसम्म चुक्ता पूँजी भएका कम्पनीले अब आईपीओ जारी गर्न पाउने छन् । कम्पनीले जारी पूँजीको ३० प्रतिशतभन्दा घटी र ४९ प्रतिशतभन्दा बढी नहुने गरी शेयर निष्कासन गर्न सक्ने नियमावलीमा उल्लेख छ । यसरी जारी भएको आईपीओमा सर्वसाधारणले न्यूनतम ५ सय कित्ताका दरले आवेदन दिन पाउनेछन् । ५ सय कित्ताभन्दा कम आवेदन दिन पाइने छैन ।

सर्वसाधारणलाई आईपीओ खुलाउनुअघि मर्चेन्ट बैंकरले ५ प्रतिशत र संस्थागत शेयरधनीले १५ प्रतिशत शेयर खरिद गरेको हुनुपर्नेछ । यस्ता लगानीकर्ताको लकइन पिरियड तीन वर्षको हुनेछ । अर्थात् तीन वर्षपछि मात्रै उनीहरूले शेयर बिक्री गर्न पाउनेछन् ।

नियमावलीको आवश्यक कार्यान्वयनका लागि नेपाल स्टक एक्सचेन्ज तथा सीडीएस एन्ड क्लियरिंगलाई पत्राचार गरिएको धितोपत्र बोर्डले जनाएको छ । शेयर निष्कासनका लागि खुला गरिएको धितोपत्र बिक्री बन्द भएको मितिले १५ दिनभित्र बाँडफाँट गर्नुपर्ने छ । साना तथा मझौला कम्पनीले आईपीओ जारी गर्नुअघि रेटिङ आवश्यक परेमा बोर्डले रेटिङ गराउन निर्देशन दिन सक्नेछ । तर रेटिङ नगरी पनि शेयर निष्कासन गर्न सक्नेछ ।

प्रकाशित मिति: बिहीबार, माघ ३, २०८१ १५:०५