रौतहट । रौतहटमा निर्माण सुरु भई अलपत्र अवस्थामा रहेका विभिन्न स्थानका एक दर्जन पक्की पुलमध्ये तीन वटा पुल निर्माण सम्पन्न भएका छन् । सडक डिभिजन कार्यालय चन्द्रनिगाहपुरको मातहतमा रहेका चन्द्रनिगाहपुर–गौर सडकखण्ड अन्तर्गतको बरहवा खोलाको पुल, छेदी चोक कटहरिया सडकखण्ड अन्तर्गतको तरहरी झाँझपुल र वालचनपुर–जङ्गलसहिया सडकखण्ड अन्तर्गतको गुजरा खोला पुलको निर्माण सम्पन्न भएको छ ।
लामो समयदेखि लामो, घुमाउरो र जोखिमपूर्ण यात्राबाट आजित उक्त भेगका बासिन्दा पुल निर्माण सम्पन्न भएपछि खुसीले गदगद भएका छन् । विकासका पूर्वाधार मानिने पुल निर्माणले यातायात सहज हुन्छ । स्थानीय उत्पादनको बजारीकरण सहज, स्थानीय हाटबजार विस्तार, पशु तथा कृषिजन्य उत्पादन वृद्धि, छिमेकी बस्ती र जिल्लासँगको आवतजावत सहज हुँदा आपसी सद्भाव र सहयोग आदानप्रदान हुने तथा किसानका आयआर्जन वृद्धि हुने भएपछि उक्त भेगका बासिन्दा खुसी भएका हुन् ।
गत आर्थिक वर्ष २०८१/८२ को अन्त्यमा निर्माण सम्पन्न भएको बरहवा पुल पाँच करोड ६३ लाखख २८ हजार ९३९ रुपियाँको लागतमा निर्माण सम्पन्न भएको हो । डिभिजन सडक कार्यालय चन्द्रनिगाहपुरका प्रमुख अरुणकुमार कर्णका अनुसार उक्त पुल निर्माणको जिम्मा कनकाई इन्टरनेसनल बिल्डर्स प्रालि सुरुङ्गा झापाले पाएको थियो । २०७४ साल कात्तिक २९ गतेदेखि निर्माण कार्य थालनी गरिएको उक्त पुल दुई वर्षपछि अर्थात् २०७६ साल भदौ २७ गते हस्तान्तरण गर्नुपर्नेमा आठ वर्षपछि (२०८२ असार २५ गते) निर्माण सम्पन्न भयो ।
२०७७ साल माघ ५ गते सगुन गल्बा राजदेवी जेभीले सात करोड ८२ लाख ५३ हजार ७४५ रुपियाँ लागतमा ठेक्का पाएको गुजरा खोलाको पुल दुई वर्षभित्र निर्माण सम्पन्न गरी हस्तान्तरण गर्नुपर्नेमा करिब पाँच वर्षपछि निर्माण सम्पन्न भएको छ ।
ठेक्का पाएको सात वर्षपछि निर्माण सम्पन्न भएको झाँझखोलाको पुल पनि सञ्चालनमा आएको छ । एपेक्स–रवी जेभी काठमाडौँले २०७५ साल असार १९ गते आठ करोड २७ लाख ८१ हजार ६२२ रुपियाँमा ठेक्का सकार गरेको उक्त पुलको ९० प्रतिशतभन्दा बढी काम सम्पन्न भएको हो । पुल सञ्चालनमा आए पनि तीन वटै पुल भने हस्तान्तरण भई नसकेको डिभिजन प्रमुख कर्ण बताउनुहुन्छ ।
रौतहटको विभिन्न स्थानमा रहेका पुलमध्ये लामो समयदेखि अलपत्र अवस्थामा रहेको लालबकैया नदीको टिकुलियाघाटको पुल पनि एक हो । शिलान्यास भएको ११ वर्ष बितिसक्दा पनि उक्त पुलको भौतिक प्रगति करिब ४० प्रतिशत रहेको डिभिजन सडक कार्यालयका एक प्राविधिकले जानकारी दिनुभयो ।
२०७१ साल असार २९ गते तत्कालीन प्रधानमन्त्री सुशील कोइरालाद्वारा शिलान्यास गरिएको उकत पुल निर्माणको जिम्मा पप्पु कन्स्ट्रक्सनले पाएको थियो । डिभिजन सडक कार्यालयका सूचना अधिकारी इन्जिनियर मदनमोहन सिंहले पछिल्लो समय उक्त कन्स्ट्रक्सन विवादमा परेपछि श्री आजाद दिपु एन्ड कम्पनी जेभी गरुडाले २७ करोड ६६ लाख आठ हजार १७६ रुपियाँ लागतमा २०८० असार ६ गते सम्झौता गरी ०८१ चैत १ गते सम्पन्न गर्ने सहमति गरे पनि निर्माण कार्यले गति लिन नसकेको बताउनुभयो । उहाँका अनुसार अघिल्लो र पछिल्लो दुवै निर्माण कम्पनीको कार्य प्रगति करिब ६० प्रतिशत भएको छ ।
ईशनाथ नगरपालिकाका निमित्त प्रमुख प्रशासकीय अधिकृत नन्दकिशोर गुप्ता भन्नुहुन्छ, “गौर र ईशनाथ नगरपालिका जोड्ने उक्त पक्की पुल नबन्नाले लालबकैया पारीका औरैया, बन्जराहा, मठियालगायत ईशनाथ नगरपालिकाका नागरिक वर्षायाममा ठुलो जोेखिम मोलेर सदरमुकाम आवतजावत गर्छन् । सदरमुकाम घर भई बकैया पारी खेतबारी भएका किसान तथा बकैया पारी घर भई सदरमुकाम आवतजावत गर्ने जो कोही पनि परम्परागत डुङ्गामा जोखिमपूर्ण यात्रा गर्न बाध्य छन् ।” रौतहटमा चन्द्रनिगाहपुर–गैडाटार जोड्ने चाँदी नदी पुल, गुजरा नगरपालिका–१ स्थित कोठियार पुललगायत पाँच वटा पुल विगत एक दशकदेखि अलपत्र अवस्थामा रहेको डिभिजन सडक कार्यालय चन्द्रपुरले जनाएको छ ।
