परराष्ट्रमन्त्री राणा र राष्ट्रसंघका उपमहासचिवबीच भेटवार्ता

समाचार

गृहपृष्ठ
समाचार
परराष्ट्रमन्त्री राणा र राष्ट्रसंघका उपमहासचिवबीच भेटवार्ता

परराष्ट्रमन्त्री राणा र राष्ट्रसंघका उपमहासचिवबीच भेटवार्ता

बिहीबार, असोज १०, २०८१ ज्योति दैनिक

परराष्ट्रमन्त्री डा.आरजु राणा देउवाले संयुक्त राष्ट्रसङ्घका शान्ति सेना परिचालनसम्बन्धी उपमहासचिव जँ पिए लाख्वासँग भेटवार्ता गरेकी छन्।

त्यस अवसरमा राणाले लामो समयदेखि नेपाल शान्ति मिशनमा सहभागी भएर योगदान गरेको बताइन्। उनले मिशनको उच्च ओहोदामा नेपाललाई अवसर दिनुपर्नेमा पनि जोड दिएको न्युयोर्कस्थित संयुक्त राष्ट्रसङ्घका लागि नेपालको स्थायी नियोगले जनाएको छ।

नेपालले संयुक्त राष्ट्रसङ्घको आव्हानमा विश्वका विभिन्न द्वन्द्वग्रस्त मुलुकमा शान्ति स्थापनामा सैनिक परिचालनका हिसाबले सक्दो योगदान गरेकाले उच्च पदमा नेपाली सैन्य अधिकृत नियुक्त हुन वाञ्छनीय भएको परराष्ट्रमन्त्रीले बताइन्।

परराष्ट्रमन्त्री राणाले राष्ट्रसङ्घीय उच्च प्रतिनिधि रवाव फतिमासँग भेट गरेकी छन्। उक्त भेटमा दिगो विकासका लक्ष्य, जलवायु परिवर्तनसम्बन्धी कार्ययोजनालगायत साझा चासोका विषयमा छलफल भएको थियो।

त्यसक्रममा नेपालले अति कम विकसित देशहरुको विश्वव्यापी समन्वय समूहको अध्यक्षका नाताले अतिकम विकसित देशहरुको सामूहिक हितका खातिर एकताबद्ध भएर काम गर्नुपर्नेमा जोड दिएको छ।

यसैबीच, परराष्ट्रमन्त्री देउवा र सर्बियाका विदेशमन्त्री मार्को डिजुरिकले दुई देशका कूटनीतिक तथा सरकारी राहदानी वाहकहरुलाई प्रवेशाज्ञा आवश्यक नपर्नेसम्बन्धी सम्झौतामा हस्ताक्षर गरेका छन्। रासस

प्रकाशित मिति: बिहीबार, असोज १०, २०८१ ११:२७