वीरगञ्ज । लेनदेन पीडित संघर्ष समिति, पर्साले पर्सा क्षेत्र नम्बर २ का प्रतिनिधि सभा सदस्य सुशीलकुमार कानुलाई बिहीबार साँझ वीरगञ्जस्थित उहाँकै निवासमा भेटेर आफ्ना समस्या तथा मागहरू राखेको छ।
समितिका अध्यक्ष सुनिल पाण्डेको नेतृत्वमा गएको टोलीले सांसद कानुलाई भेटेर लेनदेनसम्बन्धी समस्या, मिटरब्याजीको आरोपमा निर्दोष लगानीकर्तासमेत पीडित बनेको तथा कानुनसम्मत रूपमा भएका कारोबारलाई समेत एकतर्फी रूपमा हेर्ने गरिएको भन्दै आफ्ना गुनासा राखेको हो।
समितिले सरकार र मिटरब्याजी पीडितका प्रतिनिधिबीच भएको ९ बुँदे सहमति तथा लिखत–कपाली र चेकसम्बन्धी निर्णयका कारण कानुनसम्मत रूपमा लगानी गरेका व्यक्तिहरू समेत समस्यामा परेको दाबी गरेको छ। पर्याप्त प्रमाणबिना सबै लगानीकर्तालाई ‘मिटरब्याजी’को संज्ञा दिँदा सामाजिक प्रतिष्ठामा समेत गम्भीर असर परेको समितिको भनाइ छ।
भेटका क्रममा समितिका प्रतिनिधिहरूले ऋणी र लगानीकर्ता दुवै पक्षको कुरा सुनेर निष्पक्ष छानबिन गरी दोषीलाई मात्र कानुनी दायरामा ल्याउन तथा निर्दोष लगानीकर्तालाई अनावश्यक रूपमा प्रताडित नगर्न सांसद कानुसँग आग्रह गरेका थिए।
ज्ञापनपत्र बुझ्दै सांसद सुशीलकुमार कानुले समितिले उठाएका विषयलाई आफूले गम्भीरतापूर्वक लिएको बताउँदै उनीहरूको आवाज प्रतिनिधि सभा बैठकमा उठाउने प्रतिबद्धता जनाएका छन्।
सांसद कानुले समस्या समाधानका लागि आफूले सक्दो सहयोग गर्ने बताउँदै गलत काम गर्ने व्यक्तिको पहिचान गरी कानुनी दायरामा ल्याउनुपर्ने धारणा व्यक्त गरे। ‘मिटरब्याजी’को विषयमा केही व्यक्तिहरू दोषी भए पनि सबै लगानीकर्तालाई एउटै दृष्टिकोणले हेर्न नहुने भन्दै उनले निर्दोष व्यक्तिको प्रतिष्ठामा असर पर्ने गरी हुने व्यवहारप्रति समेत ध्यान दिनुपर्ने बताए।
समितिले आफ्ना माग सम्बोधनका लागि सांसद कानुमार्फत संसद्मा आवाज उठाइदिन आग्रह गरेको छ। सांसद कानुले समेत सम्बन्धित निकायमा विषय उठाउँदै समस्या समाधानका लागि पहल गर्ने प्रतिबद्धता जनाएका छन्।
