पूर्व अध्यक्ष चौरसियाको प्रश्न : ‘विकासमा अवरोध गर्नेहरू आज किन मौन छन् ?’

समाचार

गृहपृष्ठ
समाचार
पूर्व अध्यक्ष चौरसियाको प्रश्न : ‘विकासमा अवरोध गर्नेहरू आज किन मौन छन् ?’

पूर्व अध्यक्ष चौरसियाको प्रश्न : ‘विकासमा अवरोध गर्नेहरू आज किन मौन छन् ?’

आइतबार, भदौ २८, २०८३ ज्योति दैनिक

पकाहा मैनपुर । पकाहा मैनपुर गाउँपालिकाका पूर्व अध्यक्ष विजय चौरसियाले आफ्नो कार्यकालको आलोचना गर्दै आएका व्यक्तिहरूप्रति लक्षित गर्दै सामाजिक सञ्जालमार्फत धारणा सार्वजनिक गरेका छन्।

चौरसियाले विगत केही समयदेखि आफूले नेतृत्व गरेको कार्यकाललाई लिएर निरन्तर आलोचना भइरहेको उल्लेख गर्दै आफ्नो कार्यकालमा इमानदार भएर काम गर्न प्रयास गरिएको बताएका छन्। राजनीतिमा नयाँ भए पनि गाउँपालिकाको विकास र समृद्धिका लागि प्रतिबद्ध भएर काम गरेको उनको भनाइ छ।

उनले आफ्नो कार्यकालमा विकास निर्माणका काममा सहयोग गर्नुको सट्टा घेराबन्दी र विरोध मात्र गरिएको दाबी गरेका छन्। आफूहरूले गरेका राम्रा तथा कमजोरीका कामबारे स्थानीय जनता जानकार रहेको उल्लेख गर्दै उनले त्यसको मूल्याङ्कन जनताले नै गर्ने बताएका छन्।

पूर्व अध्यक्ष चौरसियाले आफू लामो समयदेखि मौन बसेको भन्दैमा आफू गलत भएको अर्थ नलाग्ने स्पष्ट पारेका छन्। आफूविरुद्ध विभिन्न आरोप लगाएर फसाउने प्रयास भए पनि कुनै आरोप प्रमाणित हुन नसकेको उनको दाबी छ।

हाल गाउँपालिकामा देखिएका विभिन्न समस्या र लापरवाहीका विषयमा प्रश्न उठाउँदै उनले आफ्नो कार्यकालमा कडा आलोचना गर्ने व्यक्तिहरू अहिले किन मौन बसेका छन् भन्ने प्रश्न गरेका छन्। विगत चार वर्षमा गाउँपालिकामा भएका कामकारबाहीबारे समीक्षा गर्न र प्रश्न उठाउन सम्बन्धित पक्षसँग साहस हुनुपर्ने उनको भनाइ छ।

चौरसियाले आफू धेरै बोल्नेभन्दा काम गरेर देखाउने पक्षमा रहेको उल्लेख गर्दै पकाहा मैनपुर गाउँपालिकालाई सुन्दर, समृद्ध र विकसित गाउँपालिकाका रूपमा स्थापित गर्ने सपना अझै कायम रहेको बताएका छन्।

प्रकाशित मिति: आइतबार, भदौ २८, २०८३ ११:५५