वीरगन्ज । वीरगन्जको ऐतिहासिक रानीघाट मठमा आयोजित एक कार्यक्रममा स्थानीय अभियन्ताहरूले समाजमा सद्भाव, न्याय र कानुनको निष्पक्ष पालना हुनुपर्नेमा विशेष जोड दिएका छन्। कार्यक्रमका सहभागीहरूले वीरगन्जको समृद्धिका लागि समाजका सम्पूर्ण पक्षहरूबीच समन्वय, संयम र सहकार्यको खाँचो औंल्याएका छन्।
कार्यक्रममा हिन्दूसम्राट सेनाका पर्सा जिल्ला अध्यक्ष विकास साह तथा अभियन्ता कृष्णा यादव लगायतका वक्ताहरूले समाजमा देखिएका विविध असझदारी तथा विवादहरूलाई कानुनी र न्यायिक प्रक्रियाबाटै उचित समाधान खोजिनुपर्ने धारणा व्यक्त गर्नुभयो। उहाँहरूले हिन्दूवादी अभियन्ता रञ्जन सिंह राजपुत जोडिएको विषयमा निष्पक्ष, पारदर्शी र दबाबरहित छानबिन गरी सत्यतथ्य बाहिर ल्याउन सम्बन्धित निकाय ध्यानाकर्षण गराउनुभयो।
वक्ताहरूले वीरगन्जको विकास, सार्वजनिक सम्पत्तिको संरक्षण र करदाताको रकमको सही सदुपयोगका लागि स्थानीय सरकार र नागरिक तहबाट निरन्तर सकारात्मक सहकार्य हुनुपर्नेमा जोड दिएका छन्। सार्वजनिक संरचना र जग्गाजमिनको संरक्षण गर्दै वीरगन्जलाई सुन्दर र व्यवस्थित सहर बनाउन सबैको साझा प्रयास आवश्यक रहेको उहाँहरूको भनाइ थियो।
सो क्रममा उपस्थित समाजसेवी तथा अभियन्ताहरूले जुनसुकै घटनामा पनि राजनीतिक वा व्यक्तिगत प्रभावभन्दा माथि उठेर कानुनी राज्यको सम्मान गरिनुपर्ने बताएका छन्। वीरगन्जका सर्वसाधारण नागरिकको हितलाई केन्द्रमा राखी आगामी दिनमा आपसी भाइचारा, शान्ति र न्यायको वातावरण सुदृढ बनाउँदै लैजाने ऐक्यबद्धतासमेत कार्यक्रममा व्यक्त गरिएको थियो।
