अन्नपूर्ण बेस क्याम्पबाट १६२ जना पर्यटकको उद्धार

समाचार

गृहपृष्ठ
समाचार
अन्नपूर्ण बेस क्याम्पबाट १६२ जना पर्यटकको उद्धार

अन्नपूर्ण बेस क्याम्पबाट १६२ जना पर्यटकको उद्धार

बिहीबार, कात्तिक १४, २०८२ ज्योति दैनिक

काठमाडौँ । सशस्त्र प्रहरी बलले म्याग्दी जिल्लाको अन्नपूर्ण बेसक्याम्पबाट बिहीबार बिहानसम्म १६२ जना पर्यटकको उद्धार गरेको छ । अब अन्नपूर्ण बेसक्याम्पमा कोही पनि आन्तरिक तथा बाह्य पर्यटक छैनन् । सशस्त्रका सहप्रवक्ता एवम् डिएसपी शैलेन्द्र थापाले सबैलाई सुरक्षित स्थानमा ल्याइएको जानकारी दिनुभयो । साथै अन्नपूर्ण बेस क्याम्पमा हिउँ पहिरो आइरहेको जानकारी पनि उहाँले दिनुभयो ।

उहाँका अनुसार सशस्त्र प्रहरी बल नेपाल विपद् व्यवस्थापन बेस नारच्याङ म्याग्दीबाट कात्तिक ११ गते उद्धारका लागि सुरक्षा फौज बेसक्याम्पतर्फ गएको थियो । सशस्त्र प्रहरी निरीक्षक विनोद पौडेलको कमान्डमा गएको फौजले १७ विदेशी पर्यटकसहित एक सय ६२ जनाको उद्धार गरेको हो । बाक्लो हिमपातका कारण जोखिममा परेका र बाटो पत्ता लगाउन नसकेर अलपत्र परेका पर्यटक हरुको डोरिको सहायताले बाटो पहिल्याउँदै उद्धार गरिएको हो ।

सबै पर्यटकको उद्धार भएपछि यतिखेर बेसक्याम्प खाली भएको छ । तीन दिनको निरन्तर प्रयासपछि बेसक्याम्प हिँडेका केही पर्यटकलाई बाटोबाट नै फर्काइएको थियो । हिजो बुधबार मात्रै बेसक्याम्पबाट ५२ जना पर्यटक र बाटो बिराएर अलपत्र परेका २० जनालाइ सुरक्षित स्थानमा ल्याइएको थियो । मङ्गलबारबाट फर्काइएका र आज बिहान पनि बेसक्याम्पबाट तल झारिएकासहित १६२ जनाको उद्धार भएको हो । उद्धार गरिएकाहरुलाइ गुफाफाँट, सादिखर्क लगायत हिमपात नभएको स्थानसम्म सुरक्षित ल्याइएको छ । उनीहरु सबै हिमपात नभएको सुरक्षित स्थानमा छन् । उद्धार गरिएका केहीमा श्वासप्रश्वास लगायत स्वास्थ्य समस्या देखिए पनि ठुलो समस्या देखिएको छैन ।

प्रकाशित मिति: बिहीबार, कात्तिक १३, २०८२ १२:०४