भारतबाट नब्बे हजार मेट्रिक टन गहुँ आयात गरिँदै

समाचार

गृहपृष्ठ
समाचार
भारतबाट नब्बे हजार मेट्रिक टन गहुँ आयात गरिँदै

भारतबाट नब्बे हजार मेट्रिक टन गहुँ आयात गरिँदै

मंगलबार, माघ १५, २०८१ ज्योति दैनिक

काठमाण्डौ । भारतबाट ९० हजार मेट्रिक टन गहुँ आयात हुने भएको छ । देशभित्र माग अनुसार गहुँको उत्पादन हुन नसकेपछि छिमेकी भारतबाट आयात गर्न लागिएको हो ।

उद्योग, वाणिज्य तथा आपूर्ति मन्त्रालयले भारत सरकारसँग दुई लाख मेट्रिक टन गहुँको माग गरेकोमा भारतले नेपाललाई ९० हजार मेट्रिक टन उपलब्ध गराउने सहमति जनाएको थियो । त्यस अनुसार गहुँ आयात गर्नका लागि आवेदन माग गरिएको छ ।

नेपालमा झण्डै २१ लाख मेट्रिक टन गहुँ उत्पादन हुने गरेको छ । यो उत्पादनले माग धान्न पुग्दैन । कृषि तथा पशुपन्छी विकास मन्त्रालयका अनुसार आर्थिक वर्ष २०७९/८० मा ६ लाख ९७ हजार ७ सय ६२ हेक्टर क्षेत्रफलमा २० लाख ९८ हजार ४ सय ६२ मेट्रिक टन गहुँ उत्पादन भएको थियो ।

वाणिज्य, आपूर्ति तथा उपभोक्ता संरक्षण विभागले भारतबाट ९० हजार मेट्रिक टन गहुँ आयात गर्न इच्छुक फर्म र कम्पनीका लागि आवेदन माग गरेको हो ।

गहुँ आयातका लागि इच्छुक फर्म वा कम्पनीले न्यूनतम एक सय मेट्रिक टनदेखि १० हजार मेट्रिक टन गहुँको परिणाम खुलाई सात दिनभित्र विभागमा आवेदन दिनुपर्ने सूचनामा उल्लेख छ ।

Notice_about_import_of_wheat_finao_one_8r6aQ0FqUc-1738036123.jpg