चितवन राष्ट्रिय निकुञ्जमा आजदेखि जीप सफारी बन्द

समाचार

गृहपृष्ठ
समाचार
चितवन राष्ट्रिय निकुञ्जमा आजदेखि जीप सफारी बन्द

चितवन राष्ट्रिय निकुञ्जमा आजदेखि जीप सफारी बन्द

सोमबार, असार १६, २०८२ ज्योति दैनिक

चितवन । चितवन राष्ट्रिय निकुञ्जले आजदेखि निकुञ्जभित्र जीप सफारी बन्द गरेको छ । निकुञ्जले सूचना निकालेर वन्यजन्तु तथा चराचुरुङ्गीको प्रजननको समय भएकाले आजदेखि लागू हुनेगरी जीप सफारी बन्द गरेको जनाएको छ ।

निकुञ्जका सूचना अधिकारी अविनाश थापा मगरका अनुसार असोजको पहिलो वा दोस्रो हप्तासम्म जीप सफारी बन्द गरिएको हो । त्यति बेला ठूलो वर्षा भएमा केही ढिलो खुल्ने भए पनि वर्षा कम भएमा असोजको पहिलो हप्ता सफारी खुल्नेछ ।

वर्षाको समय जङ्गली जनावरका लागि प्रजननको समय मानिन्छ । मानिसहरू यस समयमा निकुञ्जभित्र प्रवेश गर्दा जङ्गली जनावरको बासस्थान तथा प्रजननमा पनि दख्खल पर्न सक्ने भन्दै निकुञ्जले जीप सफारी बन्द गरेको हो ।

निकुञ्जको सौरहा क्षेत्रबाट ३२, कसराबाट २१, मेघौलीबाट ११ र नवलपरासीबाट ९ वटा जीपले निकुञ्जभित्र पर्यटक घुमाउने गर्दछन् । निकुञ्जबाहिरका मध्यवर्ती वन क्षेत्रमा जीप सफारी नियमित सञ्चालन हुनेछ ।

प्रकाशित मिति: सोमबार, असार १६, २०८२ १५:४२