काठमाडौँ । काठमाडौँ उपत्यकामा शुक्रबार रातिदेखि परेको अविरल वर्षाका कारण कीर्तिपुर नगरपालिका–१० स्थित सुन्दरीघाटमा रहेको ‘राधास्वामी होल्डिङ सेन्टर’ डुबानमा परेपछि त्यहाँ राखिएका सुकुमबासीलाई भक्तपुरको खरीपाटी स्थानान्तरण गरिने भएको छ ।
अधिकार सम्पन्न बागमती सभ्यता एकीकृत विकास समितिका आयोजना निर्देशक मचाकाजी महर्जनका अनुसार सेन्टरमा बाढी पसेका कारण ६५ परिवारलाई सुरक्षित स्थानमा सार्न लागिएको हो ।
समितिका आयोजना निर्देशक महर्जनले कीर्तिपुरको सेन्टरमा बाढी पसेपछि प्रभावितहरूलाई सुरक्षित राख्न खरीपाटी लैजान लागिएको बताए ।
‘अहिले हाम्रो खरीपाटी होल्डिङ क्षेत्रमा ठाउँ खाली गराएका छौँ,’ आयोजना निर्देशक महर्जनले भने, ‘कीर्तिपुरका प्रभावितहरूलाई हामी उतै लैजान्छौँ होला र आवश्यक व्यवस्थापन मिलाउँछौँ ।’
समितिले यसअघि नै सुकुमबासीहरूलाई सुरक्षित स्थानमा सर्न र आफैँ कोठा खोज्नका लागि पहिलो चरणको राहत तथा पुनर्स्थापना स्वरूप प्रतिपरिवार २५ हजार रुपैयाँ उपलब्ध गराउँदै होल्डिङ सेन्टर खाली गर्न सूचना जारी गरेको थियो । तर उनीहरुले सेन्टर छोड्न हिचकिचाहट गर्दा सोही स्थानमै बसिरहेका थिए ।
आयोजना निर्देशक महर्जनले भने, ‘अस्तिदेखि नै हामीले सार्नुपर्यो भनिरहेका थियौँ । उहाँहरू सर्न अलिकति नमानिरहनुभएको हुनाले मात्र स्थानान्तरणमा केही अलमल भएको हो ।’
उनका अनुसार समितिले सुरुमा आफ्नो व्यवस्थापन आफैँ गर्न सक्नेहरूलाई घरभाडा खोजेर बस्न र असक्त तथा अपाङ्गता भएका व्यक्तिहरूलाई सरकारी तवरबाटै सुरक्षित ठाउँमा राख्ने योजना बनाएको थियो । तर, आकस्मिक रूपमा बाढी पसेर विपद्को स्थिति सिर्जना भएपछि अहिले प्रभावित सबैलाई खरीपाटीमा सार्न लागिएको छ ।
