धनुषामा २० वर्षीया विवाहित महिला आफ्नै घरमा मृत अवस्थामा फेला, हत्याको आशंका

समाचार

गृहपृष्ठ
समाचार
धनुषामा २० वर्षीया विवाहित महिला आफ्नै घरमा मृत अवस्थामा फेला, हत्याको आशंका

धनुषामा २० वर्षीया विवाहित महिला आफ्नै घरमा मृत अवस्थामा फेला, हत्याको आशंका

सोमबार, असोज १९, २०८३ ज्योति दैनिक

जनकपुर । धनुषामा एक विवाहित महिलाको शंकास्पद मृत्यु भएको छ ।

जनकपुरधाम उपमहानगरपालिका वडा नम्बर १६ कपिलेश्वरमा स्थानीय विनोद दासकी पत्नी २० वर्षीया प्रियंका दास मृत फेला परेकी हुन् । उनको शव घरको ओछ्यानमा फेला परेको जिल्ला प्रहरी कार्यालयले जनाएको छ ।

मृतक दासका आफन्तका अनुसार आइतबार साँझ प्रियंका आफ्नै सुत्ने कोठाको सिलिङ पंखामा सलको पासो लगाई झुण्डिएको अवस्थामा देखेपछि उनका श्रीमान् विनोदले पासो खोली मृतकको शवलाई ओछ्यानमा राखेका थिए ।

उक्त घटनाको जानकारी हुनासाथ प्रहरी चौकी कपिलेश्वरको टोली सो स्थानमा पुगेर शवलाई सुरक्षा दिएको थियो । अबेर रातिसम्म स्थानीयवासीले उक्त घरअगाडि प्रहरी प्रशासनको विरोध गरेका थिए । उनीहरूले मृतक दासको हत्या भएको भन्दै विरोध गरेका थिए ।

प्रदर्शनमा उत्रिएका स्थानीयवासीले घटना भएको स्थान पत्रकारले हेर्न पाउनुपर्ने माग गर्दै प्रहरीविरुद्ध चर्का नाराबाजीसमेत गरेका थिए ।

जिल्ला प्रहरी कार्यालय धनुषाका प्रवक्ता एवं डिएसपी ओमप्रकाश खनालले घटनास्थलमा प्रहरी पुगेर शवको मुचुल्का उठाउने काममा जुटेको बताए । उनका अनुसार प्रारम्भिक सोधपुछका निम्ति मृतकका श्रीमान् विनोदलाई जिल्ला प्रहरी कार्यालयमा नियन्त्रणमा राखिएको छ ।

प्रकाशित मिति: सोमबार, असोज १९, २०८३ १२:४०