माघ ५ गतेदेखि प्याब्सन पर्साको आयोजनामा अन्तर विद्यालय टि–ट्वाण्टी क्रिकेट प्रतियोगिता हुने

समाचार

गृहपृष्ठ
समाचार
माघ ५ गतेदेखि प्याब्सन पर्साको आयोजनामा अन्तर विद्यालय टि–ट्वाण्टी क्रिकेट प्रतियोगिता हुने

माघ ५ गतेदेखि प्याब्सन पर्साको आयोजनामा अन्तर विद्यालय टि–ट्वाण्टी क्रिकेट प्रतियोगिता हुने

सोमबार, माघ २, २०७९ ज्योति दैनिक

वीरगन्ज । निजी तथा आवासीय विद्यालयको छाता संगठन प्याब्सन पर्साको आयोजनामा माघ ५ गतेदेखि अन्तर विद्यालय टि–ट्वाण्टी क्रिकेट प्रतियोगिता हुने भएको छ ।

प्याब्सन पर्साले सोमबार मूनलाईट माविको परिसरमा पत्रकार सम्मेलन गरेर क्रिकेट प्रतियोगिता आयोजना गर्न लागेको जानकारी दिएको हो । माघ ५ गते बलिदानी दिवस पनि परेको हुँदा शहिदहरुको सम्मानका लागि क्रिकेट प्रतियोगिताको आयोजना गर्न लागिएको प्याब्सन पर्साका अध्यक्ष पूरन प्रधानले जानकारी दिनुभयो ।

प्रतियोगितामा २६ वटा भन्दा बढी विद्यालयका १० कक्षासम्मका विद्यार्थीहरुले भाग लिने छन् । प्रतियोगिताको विजेता टिमले शिल्ड, प्रमाणपत्र तथा उत्कृष्ट खेलाडीहरुलाई विधागत रुपमा पुरस्कारको व्यावस्था पनि गरिएको छ । प्रतियोगितामा करिब साढे सात लाख रुपैंया खर्च हुने अनुमान गरिएको पत्रकार सम्मेलनमा अध्यक्ष प्रधानले जानकारी गराउनुभयो ।

प्रधानको अध्यक्षतामा आयोजना गरिएको पत्रकार सम्मेलनमा प्याब्सनका केन्द्रीय सदस्य छेडुप लामा, मधेस प्रदेश अध्यक्ष श्याम केसी, पर्साका बरिष्ठ उपाध्यक्ष सरोज चौधरी, बरिष्ठ सल्लाहाकार डाक्टर हरिशंकर साह, मार्टिन मोक्तान लगायतको उपस्थिति रहेको थियो । कार्यक्रमको सहजीकरण प्याब्सनका प्रवक्ता अशोक संग्रौलाले गर्नुभएको थियो ।

प्रकाशित मिति: सोमबार, माघ २, २०७९ २१:०२