‘बिरामी’ भएको भन्दै विश्वासको मत लिने कार्यसूची सार्न मुख्यमन्त्री यादवद्वारा सभामुखलाई आग्रह

समाचार

गृहपृष्ठ
समाचार
‘बिरामी’ भएको भन्दै विश्वासको मत लिने कार्यसूची सार्न मुख्यमन्त्री यादवद्वारा सभामुखलाई आग्रह

‘बिरामी’ भएको भन्दै विश्वासको मत लिने कार्यसूची सार्न मुख्यमन्त्री यादवद्वारा सभामुखलाई आग्रह

बुधबार, जेठ २३, २०८१ ज्योति दैनिक

जनकपुरधाम । मधेशका मुख्यमन्त्री सरोज कुमार यादवले विश्वासको मत नपाउने अवस्था देखेपछि प्रदेशसभाको कार्यसूची सार्न सभामुखलाई आग्रह गरेका छन् ।

मुख्यमन्त्री यादवले विश्वासको मत लिने सम्बन्धी कार्यसूची सार्न सभामुख रामचन्द्र मण्डललाई पत्र पठाउँदै आग्रह गरेका हुन् ।

मुख्यमन्त्री यादवले आफू अस्वस्थ्य रहेको कारण देखाउँदै विश्वासको मत लिने सम्बन्धी कार्यसूची सार्न आग्रह गरेको सभामुख मण्डलले बताए ।

मुख्यमन्त्री यादवकै आग्रह अनुसार आज दिउँसो ३ बजेका लागि बोलाइएको प्रदेशसभा बैठक बोलाइएको छ । तर कार्यसूची सार्न आग्रह गरेपछि अब के गर्ने विषयमा सभामुख मण्डल छलफलमा जुटेका छन् । उनले परामर्श समिति एवम् दलका नेताहरूसँग छलफल गरेर मात्रै के गर्ने निर्णय लिने बताए ।

नेकपा एमाले र नेकपा माओवादी केन्द्रले सरकारबाट बाहिरिएर समर्थन फिर्ता लिएपछि मुख्यमन्त्री यादव संवैधानिक व्यवस्था अनुसार विश्वासको मत लिने तयारी गरेका थिए । तर नेकपा एस पनि सरकारबाट समर्थन फिर्ता लिएपछि मुख्यमन्त्री पछि हटेका छन् ।

जसपा नेपालका मुख्यमन्त्री यादवलाई नेपाली कांग्रेसले विश्वासको मत दिने निर्णय गरेको छ । लोसपा के गर्नेमा अझै अन्योलमै छ ।

प्रकाशित मिति: बुधबार, जेठ २३, २०८१ १३:२८