एक वर्षमा जिल्ला प्रशासन कार्यालयमा रौतहटमा पर्‍यो ९ सयभन्दा बढी उजुरी

समाचार

गृहपृष्ठ
समाचार
एक वर्षमा जिल्ला प्रशासन कार्यालयमा रौतहटमा पर्‍यो ९ सयभन्दा बढी उजुरी

एक वर्षमा जिल्ला प्रशासन कार्यालयमा रौतहटमा पर्‍यो ९ सयभन्दा बढी उजुरी

सोमबार, साउन १४, २०८१ ज्योति दैनिक

रौतहट। जिल्ला प्रशासन कार्यालय रौतहटमा एक वर्षको अवधिमा ९ सयभन्दा बढी ठाडो उजुरी परेको छ। गत आर्थिक वर्ष २०८०!८१ को असार मसान्त सम्म कुल ९२३ ठाडो उजुरी परेको हो। शान्ति सुरक्षा, लेनदेन, जग्गा जमिन सम्बन्धी लगायतको विषयमा परेको उक्त उजुरी मध्ये अधिकांश फर्छ्यौट भइसकेको प्रमुख जिल्ला अधिकारी हिरालाल रेग्मीले जानकारी दिए ।

त्यसैगरी सार्वजनिक अपराध हाल केही अभद्र व्यवहार तथा शान्ति विरुद्धको कसुरमा एक वर्षको अवधिमा २२० मुद्दा दर्ता भएको र अघिल्लो आर्थिक वर्षको समेत गरी कुल ३६४ मुद्दा फर्छ्यौट भएको रेग्मीले जानकारी दिए।

उनका अनुसार अघिल्लो आर्थिक वर्ष २०७९।८० को तुलनामा गत आर्थिक वर्षमा राहदानी लिनेको सङ्ख्या घटेको छ। अघिल्लो आर्थिक वर्षमा १२ हजार ७ सय ४८ जनाले राहदानी लिएको स्थानमा गत आर्थिक वर्षमा मात्र ९ हजार २१ जनाले राहदानी लिएको जिल्ला प्रशासन कार्यालय रौतहटको तथ्याङ्कमा उल्लेख गरिएको छ ।चन्द्रपुर नगरपालिकाका बासिन्दाहरूले इलाका प्रशासन कार्यालय हरिवन सर्लाहीबाट राहदानी बनाउने गरेको कारण रौतहटमा राहदानी लिनको सङ्ख्या घटेको हो ।

त्यसैगरी ९ हजार ३५३ जनाले राहदानीको सिफारिस लिएका छन्।

गत आर्थिक वर्षमा कूल १० हजार ९ सय ४७ जनाले वंशज,७ सय ३७ जनाले वैवाहिक अङ्गीकृत नागरिकता लिएको र १७ हजार ६८२ जनाले नागरिकताको प्रतिलिपि लिएको उल्लेख गरिएको छ। त्यस्तै सोही अवधिमा १९ हजार ९ सय ८८ विवाह दर्ता,२ नयाँ दर्ता सहित २५३ संस्था नवीकरण, र २२९ हात हतियार अनुमति पत्र नवीकरण भएको छ।

प्रकाशित मिति: सोमबार, साउन १४, २०८१ १५:५६