साइड नदिएको भन्दै यात्रुवाहक सुमो तोडफोड, ११ जना पक्राउ

समाचार

गृहपृष्ठ
समाचार
साइड नदिएको भन्दै यात्रुवाहक सुमो तोडफोड, ११ जना पक्राउ

साइड नदिएको भन्दै यात्रुवाहक सुमो तोडफोड, ११ जना पक्राउ

बिहीबार, पुस २५, २०८१ ज्योति दैनिक

काठमाडौं । काभ्रेको नमोबुद्ध नगरपालिका–२ सिमलचौरस्थित वीपी राजमार्गमा यात्रुबाहक टाटा सुमोमाथि तोडफोड भएको छ ।

बुधबार साँझ ६ बजेतिर भोजपुरबाट काठमाडौं आउँदै गरेको ना १ ख ६१७२ नम्बरको यात्रुबाहक सुमोमाथि तोडफोड भएको हो । काठमाडौं आउँदै गरेको उक्त सुमोलाई बनेपाबाट मंगलबारतर्फ जाँदै गरेका दुई वटा कारमा सवार युवाहरुले तोडफोड गरेका हुन् ।

यात्रु भित्रै रहेको अवस्थामा बाहिरबाट आक्रमण गर्दै सुमोको सिसा समेत फुटाइएको थियो ।

तोडफोडमा संलग्न भएको आरोपमा ११ जनालाई पक्राउ गरिएको जिल्ला प्रहरी कार्यालय काभ्रेका प्रवक्ता तथा डीएसपी मिनबहादुर घलेले बताए । ‘११ जनालाई पक्राउ गरेका छौं । म्याद थप गरेर अनुसन्धान अघि बढाउँछौं’ घलेले भने ।

आफूलाई साइड नदिएकाले तोडफोड गरेको ती युवाहरुले बताएको प्रहरीले जनाएको छ । ‘बाटो साँघुरो भएका कारण जहाँ पायो त्यहीँ साइड दिन पनि मिल्दैन । त्यही विषयमा सुमो रोकेर यात्रु भित्रै रहेको अवस्थामा तोडफोड गरेको देखिन्छ’ घलेले भने ।

प्रकाशित मिति: बिहीबार, पुस २५, २०८१ १२:४४