वीरगन्ज । नेपाल कम्युनिस्ट पार्टी एमाले वीरगन्ज महानगर कमिटीको नयाँ नेतृत्व चयनका लागि मतदान सुरु भएको छ । मंगलबार बिहान साढे ८ बजेदेखि नयाँ नेतृत्व चयनका लागि मतदान सुरु भएको निर्वाचन अध्यक्ष मण्डलका अध्यक्ष बिचारी यादवले बताए ।
उनका अनुसार यो मतदान दिउँसो २ बजेसम्म चल्नेछ । नोमिनेशन भएको ११ दिन पश्चात् वीरगन्ज महानगर कमिटीको नयाँ नेतृत्वका लागि आज मतदान हुँदै छ । नोमिनेशनकै दिन कर्फ्यु लागेपछि निर्वाचन स्थगन गरिएको थियो ।
गएको ३० गते महानगरको कमिटी नयाँ नेतृत्वको चयनका लागि नोमिनेशन भएको थियो । ८३ पदका लागि निर्वाचन हुँदै छ । अध्यक्ष पदमा २ जना, उपाध्यक्षमा २ जना, सचिवमा ४ जना र उपसचिवमा ४ जनाको उम्मेदवारी परेको छ ।
अध्यक्ष पदका लागि सुन्दर राउत कुर्मी र नवराज शर्माबिच कडा प्रतिस्पर्धा हुने आङ्कलन छ । आजको मतदानमा २५६ जना मतदाताले मतदान गर्ने अध्यक्ष मण्डलका अध्यक्ष यादवले बताए ।
