पर्साको बहुदरमाईमा आगलागी, घर–गोठ जलेर नष्ट

समाचार

गृहपृष्ठ
समाचार
पर्साको बहुदरमाईमा आगलागी, घर–गोठ जलेर नष्ट

पर्साको बहुदरमाईमा आगलागी, घर–गोठ जलेर नष्ट

बुधबार, साउन २९, २०८२ ज्योति दैनिक

पर्सा । पर्साको बहुदरमाई नगरपालिका–२ मा बुधबार बिहान भएको आगलागीबाट एक स्थानीयको घर र गोठ पूर्णरूपमा जलेर नष्ट भएको छ।

जिल्ला प्रहरी कार्यालय पर्साका अनुसार स्थानीय राजु रामको फुसको घर र घरसँगै रहेको गोठमा बिहान सवा ५ बजे आगलागी भएको हो। भैंसीका लागि खाेले पकाउन चुल्होमा बालिएको आगोबाट आगलागी सुरु भएको प्रारम्भिक अनुसन्धानमा खुलेको छ।

आगलागीबाट घरभित्र रहेका लत्ताकपडा, भाँडावर्तन, अन्नपात पूर्णरूपमा जलेको छ भने गोठभित्र रहेका पाडा र बाख्रा समेत जलेर मरेका छन्। आगो निभाउने क्रममा घरधनी राजु राम घाइते भएका छन् र उनको उपचार वीरगञ्जस्थित नारायणी अस्पतालमा भइरहेको प्रहरीले जनाएको छ।

प्रहरी र स्थानीयको सहयोगमा आगो नियन्त्रणमा लिइएको हो। आगलागीबाट करिब ४ लाख ५० हजार रुपैयाँ बराबरको धनमालको क्षति भएको अनुमान गरिएको छ।

प्रकाशित मिति: बुधबार, साउन २८, २०८२ ११:४८