पटना । आगामी बिहार विधानसभा चुनावका लागि एनडीएमा सिट बाँडफाँडको तस्बिर स्पष्ट भएको छ। मुख्यमन्त्री नीतीश कुमारको दिल्ली भ्रमणपछि सहमति बनेको हो।
सम्झौताअनुसार जनता दल युनाइटेड (जदयू)लाई १०२ सिट, भाजपालाई १०१ सिट, चिराग पासवानको लोजपा (रामविलास) लाई २० सिट, उपेन्द्र कुशवाहाको रालोमलाई १० सिट र जीतनराम मांझीको हम (सेक्युलर) लाई १० सिट परेको छ। तर कुन दलले कुन क्षेत्रबाट चुनाव लड्ने भन्नेबारे अझै टुङ्गो लागेको छैन। यसबारे चाँडै नै एनडीए नेताहरूले पत्रकार सम्मेलन गर्ने जनाइएको छ।
सन् २०२० को बिहार विधानसभा चुनावमा भाजपा ११० सिटमा लडेर ७४ जितेको थियो भने जदयू ११५ सिटमा लडेर ४३ मा मात्र विजयी भएको थियो। त्यस्तै, २०२४ को लोकसभा चुनावमा भाजपा १७, जदयू १६, लोजपा (रामविलास) ५ र माझी तथा कुशवाहाले १–१ सिटमा उम्मेदवारी दिएका थिए।
गत मंगलबार भाजपा नेता तथा केन्द्रीय मन्त्री धर्मेन्द्र प्रधानले मुख्यमन्त्री नीतीश कुमारसँग भेटवार्ता गरेका थिए। सो अवसरमा भाजपा नेता सम्राट चौधरी, जदयू कार्यकारी अध्यक्ष सञ्जय झा र केन्द्रीय मन्त्री ललन सिंह पनि उपस्थित थिए।
प्रधानलाई पार्टीभित्र ‘संकटमोचक’ मानिने गरिन्छ र उनी गठबन्धन दलबीचको समन्वयकर्ताको भूमिकामा सक्रिय देखिन्छन्। भेटपछि नीतीश कुमार आफ्ना दुई विश्वासपात्र ललन सिंह र सञ्जय झासहित दिल्ली प्रस्थान गरेका थिए।
