वीरगन्ज । आरम्भ भेट्रान क्लब र पर्सेली पत्रकारहरु बीच भएको मैत्रीपुर्ण फुटबल प्रतियोगितामा पत्रकारको टोली पराजित भएको छ ।
शनिबार नारायणी रंगशालामा भएको मैत्रीपुर्ण खेलमा आरम्भ भेट्रान क्लबले पत्रकारको टोलीलाई २-१ गोलअन्तर हराएको हो ।
३० मिनेटको खेलमा पहिलो हाफ सम्म दुबै टोली गोलरहित बराबरी खेलेका थिए । दोस्रो हाफको केहि मिनेटमा आरम्भ भेट्रान क्लबका खेलाडी मदन साहले पत्रकारहरु विरुद्ध गोल गरेका थिए ।
दोस्रो हाफमा निकै दबाबमा परेको पत्रकारहरुको टोली लगातार दुई गोल खाएको थियो ।
दोस्रो गोल भने सुदीप शाहिले गरेका थिए । खेलको अन्तिम समयमा पत्रकारहरुको टोलीबाट खेलाडी बिशेश्वर पटेलले एक गोल गरेका हुन ।
खेलमा पत्रकारको नेतृत्व नेपाल खेलकुद पत्रकार मञ्च पर्साका अध्यक्ष तिवारी यादवले गरेका थिए भने आरम्भ भेट्रान क्लबका सचिव सन्तोष खडकाले गरेका हुन् ।
खेलमैदान निर्माणमा जुटे खेलाडी
नारायणी रंगशालाको खेलमैदान सरसफाईदेखि मर्मत सम्भारमा यहाँका स्थानीय खेलाडीहरु खटिएका छन् । बजेट अभावका कारण जिर्ण बनेको रंगशाला निर्माण गर्न सरकार उदासिन भएको भन्दै अभ्यास गर्नका लागी खेलमैदान सरसफाईदेखि मर्मत गर्न लागेका हुन् ।
अहिले बिहानको समयमा स्थानीय खेलाडी खेलमैदानको सरसफाईदेखि मर्मत सम्भारमा जुटेको आरम्भ भेट्रान क्लबका सचिव सन्तोष खड्काले बताए । उनका अनुसार रंगशाला पुर्ण रुपमा जिर्ण भएकाले खेलकुद प्रतियोगीता पनि रोकिएको अवस्था छ। अब मैदानलाई सरसफाई गरेर भएपनि अभ्यास गर्न सकिने भएकाले यसमा खटिएको अवस्था छ ।
बिहानको समयमा खेलाडी र १३ नम्बर गणका शसस्त्र प्रहरी जवानहरु खेलमैदानमा सरसफाईदेखि मर्मतमा खटिने गरेको उनले बताए। अर्को खेलाडी सुनिल राउतले पनि यहाँको खेलमैदान जिर्ण हुदाँ खेलाडीहरुलाई अभ्यास गर्ने कुनैपनि खेलमा सहभागी हुन समस्या भएकोमा चिन्ता व्यक्त गरे काठमाडौंको दशरथ रंगशालापछिको दोस्रो ठुलो रंगशाला पटक पटक मन्त्रीले अनुगमन र निरीक्षणका क्रममा स्तरोन्नति गर्न बजेट विनियोजना गर्ने आश्वासन दिएर वेवास्ता गरीएकोमा दु:ख व्यक्त गरे ।
