वासिङ्टन । अमेरिकी राष्ट्रपति डोनाल्ड ट्रम्पको प्रशासनले कुख्यात यौन अपराधी जेफ्री एपस्टिनसँग सम्बन्धित दशकौँ पुराना सरकारी रेकर्डहरू डिसेम्बर १९ मा सार्वजनिक गर्ने सम्भावना छ। यस प्रक्रियामा एपस्टिन केससँग जोडिएका सबै इमेल, तस्बिर र कागजातहरू सार्वजनिक गरिनेछन्, जसको मुख्य उद्देश्य एपस्टिनको सञ्जाल र त्यसभित्रको सत्यता बाहिर ल्याउनु हो।
यो सञ्जालमा नाबालिग केटीहरूको शोषण भएको र विश्वका धेरै शक्तिशाली व्यक्तिहरू यसमा संलग्न रहेको आरोप लाग्दै आएको छ। यसअघि डिसेम्बर १२ मा यस केससँग सम्बन्धित १९ वटा तस्बिरहरू सार्वजनिक भइसकेका छन्, जसमा ३ वटा तस्बिर राष्ट्रपति ट्रम्पकै छन्। यसबाहेक पूर्व राष्ट्रपति बिल क्लिन्टन र अर्बपति बिल गेट्स जस्ता हस्तीहरूको तस्बिर पनि बाहिर आएको छ।
सबै रेकर्डहरू सार्वजनिक हुन अब केही समय मात्र बाँकी रहँदा अमेरिका मात्र नभई विश्वभरका राजनीतिक र व्यावसायिक क्षेत्रमा हलचल मच्चिएको छ।
एपस्टिन केसमा मुछिएका प्रमुख व्यक्तिहरू
एपस्टिनको सम्पत्तिबाट सार्वजनिक भएका १९ तस्बिरहरूमा ९ जना चर्चित व्यक्तित्वहरूको नाम अगाडि आएको छ। यी तस्बिरहरूले उनीहरूलाई सिधै अपराधी प्रमाणित नगरे पनि एपस्टिनसँगको सामीप्यताले गर्दा गम्भीर प्रश्नहरू उब्जाएका छन्। यस सूचीमा डोनाल्ड ट्रम्प, बिल क्लिन्टन, बिल गेट्स, बेलायती राजकुमार एन्ड्रयू, स्टिभ ब्यानन, ल्यारी समर्स, वुडी एलेन, रिचर्ड ब्रान्सन र एलेन डर्शोविट्ज रहेका छन्।
- ट्रम्पले किन गर्नुपर्यो हस्ताक्षर ?
गत महिना अमेरिकी संसदका दुवै सदनले एपस्टिनसँग सम्बन्धित कागजातहरू सार्वजनिक गर्ने विधेयक भारी बहुमतले पारित गरेका थिए। हाउस अफ रिप्रिजेन्टेटिभ्सले ४२७–१ को अन्तरले र सिनेटरहरूले सर्वसम्मतिले यसलाई स्वीकृत गरेका थिए। संसदका दुवै सदनबाट पारित भएपछि राष्ट्रपतिले यसमा हस्ताक्षर नगर्ने विकल्प निकै कम थियो।
यदि ट्रम्पले यसमा ‘भिटो’ प्रयोग गरेको भए पनि संसदले दुई-तिहाइ बहुमतले त्यसलाई उल्ट्याउन सक्ने अवस्था थियो। त्यसैले राष्ट्रपति ट्रम्पले नोभेम्बर १९ मा यस विधेयकमा हस्ताक्षर गर्नुपरेको थियो।
नियमअनुसार न्याय विभागले ३० दिनभित्र फाइलहरू सार्वजनिक गर्नुपर्नेछ, जसको अन्तिम मिति डिसेम्बर १८ (आज) मा पूरा हुँदैछ। न्याय विभागका अनुसार उनीहरूसँग एपस्टिनसँग सम्बन्धित हजारौँदेखि लाखौँ पृष्ठका ठूलो आर्काइभ छ।
कसरी सुरु भयो यो काण्ड?
यो घटनाको सुरुवात सन् २००५ मा फ्लोरिडामा भएको थियो, जब एक १४ वर्षीया बालिकाकी आमाले प्रहरीमा उजुरी दिएकी थिइन्। ती बालिकालाई मसाजको बहानामा एपस्टिनको घरमा बोलाएर यौन शोषणको दबाब दिइएको थियो। प्रहरी अनुसन्धानका क्रममा करिब ५० जना नाबालिग केटीहरूले एपस्टिनमाथि यस्तै आरोप लगाएको खुलासा भएको थियो।
एपस्टिनले म्यानहट्टन र पाम बीचमा रहेका आफ्ना विलासी घरहरूमा हाई-प्रोफाइल पार्टीहरू आयोजना गर्ने गर्थे। उनले आफ्नो निजी विमान ‘लोलिता एक्सप्रेस’ मार्फत कम उमेरका केटीहरूलाई ती पार्टीहरूमा ओसार्ने गर्थे। यस कार्यमा उनकी प्रेमिका गिस्लेन म्याक्सवेलले सहयोग पुर्याउँथिन्। सन् २००८ मा शक्तिशाली पहुँचका कारण उनले मात्र १३ महिनाको सामान्य सजाय पाएका थिए।
‘मी टू’ मुभमेन्ट र एपस्टिनको पतन
सन् २०१७ मा हलिउड निर्माता हार्वे वाइन्स्टिनविरुद्ध ‘मी टू’ मुभमेन्ट सुरु भएपछि एपस्टिनका काला कर्तुतहरू पुनः सतहमा आए। भर्जिनिया गिफ्रे नामकी युवतीले आफू १६ वर्षको छँदा ट्रम्पको मार-ए-लागो क्लबमा काम गर्ने क्रममा म्याक्सवेलमार्फत एपस्टिनको सम्पर्कमा पुगेको र तीन वर्षसम्म यौन शोषणमा परेको खुलासा गरिन्। त्यसपछि करिब ८० जना महिलाहरूले एपस्टिन विरुद्ध उजुरी दिएका थिए।
_1zKIa4J5Ry-(1)-1765958136.jpg)
