२ अर्ब ४१ करोड बढीको हुन्डी कारोबारमा संलग्न गुप्ता पुर्पक्षका लागि जेल चलान

समाचार

गृहपृष्ठ
समाचार
२ अर्ब ४१ करोड बढीको हुन्डी कारोबारमा संलग्न गुप्ता पुर्पक्षका लागि जेल चलान

२ अर्ब ४१ करोड बढीको हुन्डी कारोबारमा संलग्न गुप्ता पुर्पक्षका लागि जेल चलान

बिहीबार, माघ ३०, २०८२ ज्योति दैनिक

वीरगन्ज । गैर कानुनी रूपमा २ अर्ब ४१ करोड रुपैयाँभन्दा बढीको हुन्डी कारोबार गरेको आरोपमा पक्राउ परेका वीरगन्जका एक व्यक्तिलाई पर्सा जिल्ला अदालतले पुर्पक्षका लागि जेल चलान गरेको छ ।

वीरगन्ज महानगरपालिका-१ निवासी प्रशान्तकुमार गुप्ता गत १७ पुसमा पक्राउ परेका थिए । प्रारम्भमा उनी ५० हजार रुपैयाँसहित पक्राउ परेका थिए । त्यसपछि प्रहरीले उनका विभिन्न बैंक खातामाथि अनुसन्धान अघि बढाएको थियो ।

जिल्ला प्रहरी कार्यालय पर्साका अनुसार अनुसन्धानका क्रममा गुप्ताको विभिन्न बैंक खाताबाट कुल २ अर्ब ४१ करोड ७८ लाख २३ हजार ३ सय रुपैयाँ बराबरको कारोबार भएको पाइएको छ । पर्सा प्रहरी प्रमुख सुदीप राज पाठकका अनुसार सुरुवाती रूपमा थोरै रकमसहित पक्राउ परेका गुप्ताको खाताको विस्तृत अध्ययन गर्दा ठुलो परिमाणमा आर्थिक कारोबार भएको तथ्य खुलेको हो ।

प्रहरी अनुसन्धानबाट गुप्ताले भारतको रक्सौलबाट नेपाली रुपैयाँ हुन्डीमार्फत नेपाल भित्र्याई विभिन्न बैंक खातामा जम्मा गर्ने र त्यसपछि अन्य व्यक्तिहरूको खातामार्फत रकम स्थानान्तरण गरी गैर कानुनी सम्पत्ति लुकाउने गरेको खुलेको जनाएको छ ।

उक्त कारोबार बैंकमार्फत उच्च परिमाणमा भएको देखिएपछि प्रहरीले गुप्ताविरुद्ध २ अर्ब ४१ करोड रुपैयाँभन्दा बढी बिगो दाबी गर्दै संगठित हुन्डी कारोबार तथा सम्पत्ति शुद्धीकरणसम्बन्धी मुद्दा दायर गरेको थियो । सोही मुद्दामा सुनुवाइ गर्दै पर्सा जिल्ला अदालतले उनलाई पुर्पक्षका लागि थुनामा पठाउने आदेश दिएको हो । जेल चलान गरिएका गुप्ताको खातामा रहेको ३३ लाख भन्दा बढी रकम समेत जफत गरिएको पर्सा प्रहरीले जनाइएको छ ।

प्रकाशित मिति: बिहीबार, माघ २९, २०८२ ११:०८