रौतहट वनक्षेत्र भित्र निर्मित ६ अवैध घरटहरा भत्काइयो

समाचार

गृहपृष्ठ
समाचार
रौतहट वनक्षेत्र भित्र निर्मित ६ अवैध घरटहरा भत्काइयो

रौतहट वनक्षेत्र भित्र निर्मित ६ अवैध घरटहरा भत्काइयो

शुक्रबार, फागुन २९, २०८२ ज्योति दैनिक

रौतहट । रौतहटको वन क्षेत्रभित्र अवैध रूपमा निर्माण गरिएको ६ वटा घरटहरा भत्काइएको छ । चन्द्रपुर नगरपालिका–६ बेल्डीस्थित वन क्षेत्रमा निर्माण गरिएका अवैध घरटहरा भत्काएको हो।

इलाका प्रहरी कार्यालय चन्द्रनिगाहपुर, सशस्त्र प्रहरी बल बेस क्याम्प सन्तपुर, चन्द्रपुर सब–डिभिजन वन कार्यालय तथा रङपुर साझेदारी वन उपभोक्ता समूहको संयुक्त टोलीले वन क्षेत्रमा निर्माण गरिएको ६ वटा अवैध घर तथा छाप्रा भत्काएर बिहीबार अपराह्न अतिक्रमण हटाएको डिभिजन वन कार्यालय रौतहटका प्रमुख हेमन्त प्रसाद साहले बताएका छन् ।

डिभिजन प्रमुख साहका अनुसार गत २१ गते सम्पन्न प्रतिनिधिसभा सदस्य निर्वाचनको क्रममा वन कर्मचारीहरू निर्वाचन कार्यमा खटिएका बेला केही स्थानीयले वन क्षेत्रमा रातारात घर तथा छाप्रा निर्माण गरी अतिक्रमण गरेको थियो । उक्त वन क्षेत्र खाली गराउन अवैध संरचना हटाइएको हो ।

प्रमुख साहले कुनै पनि बहानामा वन अतिक्रमणलाई छुट नदिइने स्पष्ट पारेका छन् । वन क्षेत्रको संरक्षणका लागि अवैध रूपमा घर निर्माण नगर्न तथा वन अतिक्रमण नगर्न सर्वसाधारणलाई उनले आग्रह गरेका छन् ।

प्रकाशित मिति: शुक्रबार, फागुन २९, २०८२ ०९:५६