रौतहट । सापटी दिएको पैसा फिर्ता माग्दा रौतहटको कटहरिया नगरपालिका क्षेत्रमा आमा–छोरीमाथि निर्घात कुटपिट भएको छ ।
कटहरिया–८, पिप्रापोखरिया निवासी ४५ वर्षीय भागमणी देवीलाई उनका देवर नाता पर्ने ३५ वर्षीय छोटेलाल यादवले कुटपिट गरेका हुन् । पीडितका अनुसार छोटेलालले केही महिनाअघि भागमणीसँग सापटी स्वरूप १ लाख २० हजार रुपैयाँ लिएका थिए ।
आइतबार एक व्यक्तिले छोटेलाललाई दिनुपर्ने १० हजार रुपैयाँ भागमणीको ई–सेवामा पठाएका थिए । सोही रकम लिन छोटेलाल भागमणीको घर पुगेका थिए, तर भागमणीले आफूले पाउनुपर्ने रकम कटाएर बाँकी १ लाख १० हजार रुपैयाँ दिन आग्रह गरेपछि विवाद चर्किएको थियो ।
विवादकै क्रममा छोटेलालले बाँसको लाठी प्रहार गर्दै भागमणी र उनकी १० वर्षीय छोरी रबिता कुमारीमाथि कुटपिट गरेको पीडित परिवारका सदस्य झगरु यादवले पत्रकार सम्मेलनमार्फत जानकारी दिए ।
कुटपिटबाट रबिताको देब्रे हात भाँचिएको छ भने भागमणीको देब्रे हातमा गम्भीर चोट लागेको छ । उनको शरीरका विभिन्न भाग—पिठ्यु, तिघ्रा लगायतमा निलडाम देखिएको छ ।
छोटेलालले भागमणीको भैंसी र बाख्रालाई समेत कुटपिट गरी मरणासन्न बनाएको आरोप लगाइएको छ ।
घटनापछि झगरु यादव आइतबार नै फतुवा हर्षाहाबाट पोखरिया पुगेर घाइते भएका आफ्नी छोरी र नातिनीलाई कटहरिया बजारस्थित एक निजी अस्पतालमा उपचारका लागि लगेका थिए ।
पत्रकार सम्मेलनमा पीडित भागमणी देवीले गाउँकै एक जना जनप्रतिनिधिले आफ्नो श्रीमान रोहित यादवलाई उजुरी नगर्न दबाब दिँदै ‘गाउँमै मिलाइदिन्छु’ भन्दै धम्की दिएको गुनासो गरिन् । उनले छोटेलालबाट यसअघि पनि पटक–पटक कुटपिट हुँदै आएको तर जनप्रतिनिधिको दबाबका कारण न्याय पाउन नसकेको बताइन् ।
यसपटक भने न्यायका लागि पहल गरिदिन पीडित परिवारले सञ्चारकर्मीसँग आग्रह गरेका छन् ।
इलाका प्रहरी कार्यालय कटहरियाका प्रमुख एवं सई धर्मेन्द्र पौडेलले घटनाको पुष्टि गर्दै आवश्यक अनुसन्धान भइरहेको जानकारी दिए ।
