‘आर्टिमिस २’ मिसनका अन्तरिक्षयात्रीहरु भोलि बिहान झण्डै ४० मिनेट पृथ्वीको सम्पर्क भन्दा बाहिर रहने

अन्तर्राष्ट्रिय

गृहपृष्ठ
अन्तर्राष्ट्रिय
‘आर्टिमिस २’ मिसनका अन्तरिक्षयात्रीहरु भोलि बिहान झण्डै ४० मिनेट पृथ्वीको सम्पर्क भन्दा बाहिर रहने

‘आर्टिमिस २’ मिसनका अन्तरिक्षयात्रीहरु भोलि बिहान झण्डै ४० मिनेट पृथ्वीको सम्पर्क भन्दा बाहिर रहने

सोमबार, चैत २३, २०८२ ज्योति दैनिक

आर्टिमिस २ मिसनका अन्तरिक्ष यात्रीहरू चन्द्रमातर्फ यात्रा गरिरहँदा पृथ्वीसँगको निरन्तर सम्पर्कमा रहेका छन् । तर उनीहरू चन्द्रमाको पछाडि पुग्नेबित्तिकै नेपाली समयानुसार भोलि बिहान साढे ४ बजेको आसपास झण्डै ४० मिनेटसम्म पृथ्वीसँगको सम्पर्कबाट पूर्ण रूपमा बाहिर रहने बीबीसीले जनाएको छ ।

यस अवधिमा चारै जना अन्तरिक्ष यात्रीहरू अन्तरिक्षको गहिरो अन्धकारमा रहनेछन् । जहाँ उनीहरूले आफ्ना व्यक्तिगत अनुभव र भावनासँग समय बिताउनेछन् । आर्टेमिसका पाइलट भिक्टर ग्लोभरले यस समयलाई विश्वभरका मानिसहरूले सकारात्मक सोच र प्रार्थनाका लागि उपयोग गर्न आग्रह गर्नुभएको बीबीसीले उल्लेख गरेको छ । उहाँँले सम्पर्कविहीन हुँदा सबैले आफूहरुको सुरक्षित यात्राका लागि शुभकामना दिन सक्ने बताउनु भएको छ ।

यसअघि सन् १९६९ मा एपोलो ११ मुन ल्यान्डिङ मिशनका क्रममा अन्तरिक्ष यात्री माइकल कोलिन्सले पनि यस्तै अनुभव गर्नुभएको थियो । त्यो बेला नील आर्मस्ट्रङ र बज एल्ड्रिनले चन्द्रमामा अवतरण गर्नुभएको थियो । त्यो बेला अन्तरिक्ष यात्रीहरु झण्डै ४८ मिनेटसम्म सम्पर्कविहीन भएका थिए ।

अहिलेको आर्टिमिस मिसनमा पनि यो सम्पर्कविच्छेदको समय पृथ्वीमा रहेका वैज्ञानिक र इन्जिनियरहरूका लागि निकै तनावपूर्ण हुने चर्चा भइरहेको छ । सम्पर्क पुनः स्थापित भएपछि अन्तरिक्षयात्रीहरूले चन्द्रमाबाट देखिएका अद्भुत दृश्यहरू पठाउने अपेक्षा छ ।

गएको बिहीवार अमेरिकी अन्तरिक्ष एजेन्सी नासाको ‘आर्टिमिस २’ मिसनका चार जना अन्तरिक्षयात्री पृथ्वीको कक्षबाट चन्द्रमातर्फ लागेका थिए । ‘आर्टिमिस २’ ले ‘इन्जिन बर्न’ को चरण पार गरेर चन्द्रमातर्फको यात्रा शुरू गरेको हो ।

यो यान अप्रिल १० अर्थात अबको शुक्रबार प्रशान्त महासागरमा अवतरण गर्नेछ । यो अन्तरिक्ष मिसनमा तीन अमेरिकी अन्तरिक्षयात्री रिड वाइजमन, क्रिस्टिना कोच र भिक्टर ग्लोभर तथा एक क्यानडेली अन्तरिक्षयात्री जेरेमी ह्यान्सन हुनुहुन्छ ।

प्रकाशित मिति: सोमबार, चैत २३, २०८२ ०९:३६