जिराभवानीमा बाघको आक्रमणबाट ६० वर्षिय पुरुषको मृत्यु

समाचार

गृहपृष्ठ
समाचार
जिराभवानीमा बाघको आक्रमणबाट ६० वर्षिय पुरुषको मृत्यु

जिराभवानीमा बाघको आक्रमणबाट ६० वर्षिय पुरुषको मृत्यु

शनिबार, भदौ ८, २०८१ ज्योति दैनिक

पर्सा । पर्साको जिराभवानी गाउँपालिकामा बाघको आक्रमणबाट एक जना वृद्धको मृत्यु भएको छ । वडा नम्बर ५ शंकर सखुवनियाका ६० वर्षिय तुलसी राउत थारुको मृत्यु भएको प्रहरीले जनाएको छ ।

उनी गाउँनजिकैको जङ्गलमा शुक्रबार अपरान्ह घाँस काट्न गएका थिए । त्यस बेला बाघको आक्रमणमा परेर उनको मृत्यु भएको ईलाका प्रहरी कार्यालय पटेर्वासुगौलीका प्रहरी निरीक्षक मोहनजङ्ग बुढाथापाले जानकारी दिए ।

दाहिने खुट्टा र बाँया हात बाघले खाएको अवस्थामा थारुको शव आज विहान फेला परेको प्रहरी निरीक्षक बुढाथापाले बताए । शुक्रबार (हिजो) देखि बेपत्ता रहेका थारुको शव आज विहान सुगिभार नजिकको नर्सरीमा फेला परेको हो ।

उनले भने “थारु शुक्रबार अपरान्ह घरबाट घाँस काट्न जङ्गल गएका थिए । उनी अबेर रातिसम्म पनि घर नफर्के पछि स्थानियले आज विहान उनलाई खोज्न जङ्गलमा पुगे । खोज्ने क्रममा एक/एक हात खुट्टा नरहेको अवस्थामा उनको शव फेला परेको थियो ।

शव फेला परेपछि स्थानियले प्रहरीलाई खबर गरेका थिए । ईलाका प्रहरी कार्यालय पटेर्वासुगौलीका टोली शवस्थलमा पुगेर मुचुल्का उठाई शव परिक्षण (पोष्टमार्टम) गर्न वीरगञ्ज स्थित नारायणी अस्पतालमा पठाएको प्रहरी निरिक्षक मोहनजङ्ग बुढाथापाले जानकारी दिए ।

प्रकाशित मिति: शनिबार, भदौ ८, २०८१ १०:४३