झापाको शिवसताक्षीका चार वडा ‘नुनिया धानको पकेट क्षेत्र’ घोषणा

समाचार

गृहपृष्ठ
समाचार
झापाको शिवसताक्षीका चार वडा ‘नुनिया धानको पकेट क्षेत्र’ घोषणा

झापाको शिवसताक्षीका चार वडा ‘नुनिया धानको पकेट क्षेत्र’ घोषणा

मंगलबार, पुस २, २०८१ ज्योति दैनिक

झापा । झापाको शिवसताक्षी नगरपालिका परम्परागत धानको संरक्षणमा जुटेको छ । पालिकाले चार वडालाई लोपोन्मुख नुनिया धानको पकेट क्षेत्र घोषणा गरेको छ । वडा नम्बर १, ४, ७ र १० लाई कालो नुनिया धानको पकेट क्षेत्र घोषणा गरिएको हो ।

अन्य धानभन्दा ढिलो र थोरै फल्ने भएकाले किसानले विगतमा खेती गर्न छाडेका कारण कालो नुनिया लोपोन्मुख अवस्थामा पुगेको छ । मिठो स्वाद र सुगन्धका कारण नुनिया धान महँगो मूल्यमा बजारमा बिक्री हुन्छ ।

शिवसताक्षी वडा नम्बर ७ मा रहेको कञ्चन जैविक विविधता संरक्षण विकास समितिसँग सहकार्य गरेर नगरपालिकाले नुनिया धानलगायत परम्परागत धानको बीउ संरक्षण र खेतीका लागि अभियान सञ्चालन गर्दै आएको शिवसताक्षी नगरपालिकाकी उपमेयर नरमाया कार्कीले बताउनुभयो ।

उहाँले नुनिया धानको खेती गर्ने किसानलाई धानखेती गरेको जमिनको मात्राका आधारमा आर्थिक अनुदानसमेत उपलब्ध गराउँदै आएको जानकारी दिनुभयो ।

कालो नुनिया धानको भात मिठो हुने र प्रतिमन चार हजार रुपैयाँका दरले बिक्री हुने जैविक विविधता संरक्षण समितिका अध्यक्ष डिल्ली पौडेल बताउनुभयो । समितिले किसानलाई कालो नुनियाको खेती गर्न प्रोत्साहित गरिरहेको हुँदा यसको खेती बर्सेनि विस्तार हुँदै गएको दाबी गर्नुभयो ।

पछिल्लो समय कालो नुनिया धानको माग अत्यधिक बढेको हुँदा किसानले पनि खेतीमा चासो बढाएको उहाँको भनाइ छ । समितिले यसपालि किसानलाई सात टन कालो नुनियाको बीउ बिक्री गरेको जनाएको छ ।

प्रकाशित मिति: मंगलबार, पुस २, २०८१ १२:१७