उखु खेतीको विकल्पमा अन्य खेती खोज्दै कृषक

समाचार

गृहपृष्ठ
समाचार
उखु खेतीको विकल्पमा अन्य खेती खोज्दै कृषक

उखु खेतीको विकल्पमा अन्य खेती खोज्दै कृषक

सोमबार, पुस २२, २०८१ ज्योति दैनिक

रौतहट । रौतहटका कृषकले उखु खेतिको विकल्पमा अन्नबालीलगायतका अन्य खेती गर्न थालेका छन् । श्रीराम सुगर मिल बन्दपछि यहाँका कृषकले उखु खेती गर्न छाडेका हुन् ।

उखु खेतीबाट समयमा नै भुक्तानी नआउने र खेतीमा लागत बढी भएपछि विकल्पमा अन्य खेती गरेका हुन् । ०४९ देखि उखु खेती गर्दै आएका वृन्दावन–७ धमौराका रुपनारायण साहले विकल्पमा अन्य खेती गर्न थालेका छन् । यो सिजनमा उखु मासेर अन्य बाली लगाएको उनले बताए ।

तीन बिघाको खेतीबाट वार्षिक १५ देखि १७ सय क्विन्टल उखु चिनी मिललाई बेच्ने गरेको बताउँदै उनले रोप्नेदेखि बिक्री गर्ने बेलासम्म हैरानी हुने बताए ।

यहाँका कृषकले चलानी, भुक्तानीमा झमेला र मल अभावले उखु खेती लगाउन छाडेका छन् । अहिले खेतमा फाटफुट मात्र देखिने गरेको छ । करिब चार वर्षअघि श्रीराम मिल बन्द भएपछि मुस्किलले ५ हजार किसानले उखु खेती गरिरहेको उखु उत्पादक संघ रौतहटका अध्यक्ष अशोक यादवले बताए ।

वार्षिक ३० लाख क्विन्टल उखु उत्पादन हुने रौतहटमा अहिले ७/८ लाख मात्र हुने गरेको उनको भनाई छ ।

श्रीराम सुगर मिल बन्द भएपनि कटहरिया नगरपालिकामा तीन वर्षदेखि बाबा वैद्यनाथ सुगर मिल सञ्चालनमा छ । गत वर्ष १५ लाख क्विन्टल उखु क्रसिङको लक्ष्य राखेको वैद्यनाथले ८ लाखभन्दा बढी उखु खरिद गर्न नसकेपछि बन्द भएको हो । रौतहटका उखु उत्पादक कृषकले श्रीराम सुगर मिल सञ्चालन गर्नु पर्छ भन्ने अडानमा छन् भने उद्योगीहरु सञ्चालन गर्न नसकिने अवस्थामा पुगेको बताउँछन् ।

प्रकाशित मिति: सोमबार, पुस २२, २०८१ १२:१२