नगरभित्र सुशासनसहितको समावेशी विकासमा जोड दिँदै पचरौता नपाको नगर प्रमुख जलन्धर सिंह

समाचार

गृहपृष्ठ
समाचार
नगरभित्र सुशासनसहितको समावेशी विकासमा जोड दिँदै पचरौता नपाको नगर प्रमुख जलन्धर सिंह

नगरभित्र सुशासनसहितको समावेशी विकासमा जोड दिँदै पचरौता नपाको नगर प्रमुख जलन्धर सिंह

बारा । “निर्वाचन अघि जनतालाई दिएका वाचाहरू जस्तै कोल्ड स्टोर, सय शय्याको नगर अस्पताल र प्रत्येक गाउँमा पक्की सडक निर्माण मेरो पहिलो प्राथमिकता हो,” नगरप्रमुख जलन्धर सिंह जैसवारले स्थानीय तहको भूमिकाबारे आयोजित न्युज २४ को ‘सीधा कुरा मेयरसँग’ कार्यक्रममा स्पष्ट पारेका छन् ।

शुक्रवार पचरौता नगरपालिका अन्तर्गत बेनाैली बजारमा सम्पन्न कार्यक्रमकाे प्रत्यक्ष प्रसारण गरिएको थियो । स्थानीय तहको अधिकार, सेवा प्रवाह र विकास निर्माणका विविध पक्षमा छलफल गरिएको कार्यक्रममा सिंहले आफ्नो तिन वर्षे कार्यकालमा शिक्षा, स्वास्थ्य, कृषि र भौतिक पूर्वाधारका क्षेत्रमा महत्वपूर्ण प्रगति भएको दाबी गरेका छन् ।

नगरप्रमुख जैसवारले नगरभित्र सुशासनसहितको समावेशी विकासमा जोड दिँदै, “सहमति, सहकार्य र पारदर्शितामार्फत विकास योजनाहरू अघि बढाइँदैछ,” भने । उनले एमबिबिएस अध्ययनका लागि एक छात्र र एक छात्रालाई वार्षिक १०/१० लाख रुपैयाँ छात्रवृत्ति दिने र एसईईमा उत्कृष्ट नतिजा ल्याउने विद्यार्थीलाई नगद पुरस्कार दिने योजना सार्वजनिक गरेका छन् ।

कार्यक्रममा सहभागी भएका वडा अध्यक्षहरू र स्थानीय जनप्रतिनिधिहरूले पारदर्शिता, जवाफदेहिता र सूचना प्रवाह सुधारमा जोड दिनुपर्ने आवश्यकता औंल्याएका थिए । कार्यक्रम न्युज २४ का प्रस्तोता सुमन ढुंगानाले सञ्चालन गरेकाे पचराैता नगरपालिकाका नगर प्रवक्ता लक्ष्मी यादवले जानकारी गराएका हुन् ।