एआई भ्वाइस फ्रडप्रति ओपनएआईकै सीईओ साम अल्टम्यानसमेत चिन्तित

समाचार

गृहपृष्ठ
समाचार
एआई भ्वाइस फ्रडप्रति ओपनएआईकै सीईओ साम अल्टम्यानसमेत चिन्तित

एआई भ्वाइस फ्रडप्रति ओपनएआईकै सीईओ साम अल्टम्यानसमेत चिन्तित

बुधबार, साउन ८, २०८२ ज्योति दैनिक

कृत्रिम बुद्धिमत्ता (एआई) उपकरणहरूको सहयोगमा, मानव आवाजको नक्कल गरेर सुरक्षा जाँच पास गर्न र पैसा स्थानान्तरण गर्न धेरै सजिलो भएको छ । यसले ‘गम्भीर ठगी संकट’ निम्त्याउन सक्ने भन्दै एआई निर्माता कम्पनी ओपनएआईका सीईओ साम अल्टम्यानले बैंकिङ र वित्तीय क्षेत्रलाई चेतावनी दिएका छन् ।

मंगलबार वासिङ्गटनमा आयोजित अमेरिकी केन्द्रीय बैंक ‘फेडरल रिजर्भ’ (फेड)ले आयोजना गरेको एउटा सम्मेलनमा अल्टम्यानले यो कुरा भनेका हुन् । ‘एउटा कुरा छ जसले मलाई डराइरहेको छ, त्यो के हो भने केही वित्तीय संस्थानहरूले अहिले पनि भ्वाइसप्रिन्टलाई प्रमाणीकरणको रूपमा स्वीकार गरिरहेका छन् । यो पागलपनपूर्ण कुरा हो, किनकि एआईले यसलाई पूर्ण रूपमा पराजित गरिसकेको छ ।’ उनले भने ।

एक दशक अघि धनी ग्राहकहरूको लागि पहिचानको सुरक्षित माध्यमको रूपमा भ्वाइसप्रिन्टिङ अपनाइएको थियो । जसमा ग्राहकले फोनमा निश्चित वाक्य बोलेर आफ्नो पहिचान प्रमाणित गर्नुपर्थ्यो । अब भने एआईद्वारा सिर्जना गरिएको आवाजको नक्कल र भिडियो क्लोनिङ यति वास्तविक भएको छ कि तिनीहरूलाई वास्तविक कुराबाट छुट्टाउन गाह्रो भएको अल्टम्यान भन्छन् ।

अब आफूहरूलाई पहिचान पुष्टि गर्न नयाँ तरिकाहरू चाहिएकोमा पनि उनले जोड दिए । यसबारे प्रतिक्रिया जनाउँदै, फेडरल रिजर्भका उपाध्यक्ष तथा प्रमुख वित्तीय पर्यवेक्षक मिशेल बाउमनले भनिन्, ‘यो एउटा यस्तो विषय हो जुन हामीले साझेदारी गर्ने विचार गर्न सक्छौँ । विश्वभरका बैंकहरू पहिले नै डिजिटल सुरक्षाको बारेमा सतर्क भइरहेको तर द्रुत गतिमा एआई प्रविधिको बढ्दो क्षमताहरूले नयाँ चिन्ताहरू खडा गरेको समयमा यो चेतावनी आएको हो ।

प्रकाशित मिति: बुधबार, साउन ७, २०८२ १०:५३