जनकपुरधाममा सामा चकेवा महोत्सव

समाचार

गृहपृष्ठ
समाचार
जनकपुरधाममा सामा चकेवा महोत्सव

जनकपुरधाममा सामा चकेवा महोत्सव

सोमबार, कात्तिक १८, २०८२ ज्योति दैनिक

जनकपुरधाम । मैथिली विकास कोष जनकपुरधामले मधेश प्रदेशको राजधानी जनकपुरधामको जानकी मन्दिरको प्राङ्गनमा आइतबार साँझ सामा चकेवा महोत्सव २०८२ को आयोजना गरेको छ ।

मिथिलाको कला सँस्कृतिको संरक्षण सम्बर्धनका लागि आयोजना गरिएको उक्त महोत्सवमा यस क्षेत्रका १३ वटा दिदीबहिनीको समूहले समाचकेवा खेलको प्रदर्शन गर्ने मैथिली विकास कोषले जनाएको छ । कोषले प्रत्येक समूहलाई समाचकेवा खेल प्रस्तुत गर्न २० मिनेटको समय दिएको र सो समयमा दिदी बहिनीहरुले आफनो खेल प्रस्तुत गर्नुको साथै सामाचकेवासँग सम्बन्धित विभिन्न खालका गीतहरु प्रस्तुत गरेका थिए ।

१३ वटा समूहमध्ये विजेता हुने प्रथम, द्वितीय र तृतीय समूहलाई क्रमशः ११ हजार, सात हजार र पाँच हजार नगदसहित प्रमाणपत्र उपलब्ध गराउने मैथिली विकास कोषका अध्यक्ष जिवनाथ चौधरीले जानकारी दिनुभयो ।

कार्यक्रममा मधेश प्रदेशसभा सदस्य रामअशिष यादव, जनकपुरधाम उपमहानगरपालिकाका नगर प्रमुख मनोज साह, जानकी मन्दिरका महन्थ राम तपेश्वर दाससहित विभिन्न क्षेत्रका व्यक्तिहरुको उपस्थिति रहेको थियो । छठको खर्नावाट प्रारम्भ भएको सामाचकेवा पर्व कात्तिक पूर्णीमाको दिनमा सम्पन्न हुने गरेको छ ।

तराई मधेशमा मध्यरातिमा दिदी बहिनीले आफनो दाजुभाइकोे दीर्घायुको कामना गर्दै प्रत्येक दिन सामा खेल्ने गरेका छन् ।

प्रकाशित मिति: सोमबार, कात्तिक १७, २०८२ ०८:३१