काठमाडौं । नेपालमा एचआईभी संक्रमितको संख्या ३४ हजार ३ सय ३७ जना पुगेको छ । आइतबार (मंसिर १४) विश्व एड्स दिवसको अवसरमा आयोजित अन्तरक्रियामा राष्ट्रिय एड्स तथा यौन रोग नियन्त्रण केन्द्रका निर्देशक डा. सर्वेश शर्माले यसबारे जानकारी गराएका हुन् ।
उनका अनुसार कुल संक्रमितमध्ये १५ वर्षभन्दा माथिका ३३ हजार २ सय ७९ जना रहेका छन् । त्यस्तै १५ वर्ष माथिका १४ हजार जना महिलाहरूमा एचआइभी संक्रमण छ । उनले १५ वर्षभन्दा माथिका एचआईभी संक्रमित पुरुषहरूको संख्या १९ हजार २ सय ७९ रहेको जानकारी दिए ।
१ हजार ५८ जना एचआईभी पोजेटिभ बालबालिकाहरू रहेका छन् । गत एक वर्षमा आमालाई एचआईभी परीक्षण गर्दा २ सय २७ जना बालबालिकाहरू संक्रमित फेला परेका छन् ।
सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको डा. शर्माले बताए । सरदर दिनमा १.७ जना नयाँ संक्रमित थपिरहेका छन् भने दिनमा एक जनाको एचआईभीका कारण मृत्यु भइरहेको छ ।
डा. शर्माका अनुसार ८८ प्रतिशत संक्रमितहरूले औषधि सेवन गरिरहेका छन् । संक्रमितहरूमध्ये ७६ प्रतिशतले शरीरमा भाइरसको मात्रा कति छ भनेर परीक्षण गरिरहेको उनले बताए । आगामी एक वर्षभित्र एचआईभी संक्रमणविरुद्धको रणनीति बनाउनुपर्ने आवश्यकता रहेको उनको भनाइ छ ।
यस्तो छ डा. शर्माको भनाइ :
३४ हजार ३ सय ३७ जना नेपालमा एचआईभीको संक्रमित हुनसक्छ भन्ने आँकलन गरिएको छ । यसमा १५ वर्षभन्दा माथिका ३३ हजार २ सय ७९ जना हुनुहुन्छ । महिलाहरूमा १५ वर्षमाथिका लगभग १४ हजार जना हुनुहुन्छ । १५ वर्षभन्दा माथिका पुरुषहरूको कुरा गर्दा १९ हजार २ सय ७९ जना हुनुहुन्छ ।
बच्चाहरूको कुरा गर्ने हो भने लगभग १ हजार ५८ जना एचआईभी पोजेटिभ हुनुभएको छ भन्ने आँकलन छ । आमालाई एचआईभी टेस्टिङ गर्दा २ सय २७ जना बच्चाहरूमा पोजेटिभ हुनसक्छ भन्ने आँकलन छ ।
सन् २००० देखि २०२४ सम्म आउँदा नयाँ संक्रमण पनि ७६ प्रतिशतले घटेको छ । तर अझै हामी ९० प्रतिशतसम्म पुग्नुपर्नेछ । सरदर दिनमा एउटा जस्तो वा १.७ जना नयाँ क्लाइन्टहरू थपिने अवस्था छ । मृत्युको दरको कुरा गर्ने हो भने लगभग दिनमा एउटा जस्तो एचआईभीको कारणले मृत्यु हुने गर्दछ ।
