काठमाडौं । राष्ट्रिय स्वतन्त्र पार्टी (रास्वपा) र उज्यालो नेपाल पार्टीबीच भइरहेको एकता प्रयास अन्ततः असफल भएको छ। पार्टी दर्ताको अन्तिम दिनसम्म नेताहरूले सहमति मिलाउने कोशिश गरे पनि अन्तिम घडीमा सहमति जुट्न सकेन।
रास्वपाको उच्च स्रोतका अनुसार कुलमान घिसिङ कार्यवाहक सभापति बन्ने अडानबाट नहटेपछि एकता टरेको हो।
स्रोतले भन्यो, “उहाँलाई उपसभापति दिन हामी सुरुबाटै तयार थियौँ। तर केही समयका लागि भए पनि पार्टीको कमान्ड नै चाहिने माग आयो। एकताका नाममा पार्टी बुझाउन हामी तयार भएनौँ।”
यसअघि उज्यालो नेपाल पार्टीका एक नेताले भने फरक दाबी गरे। उनका अनुसार, कुलमान घिसिङ रवि लामिछानेलाई सभापति स्वीकार गरेर आफू सह–संयोजक बस्न तयार थिए।
उनले भने, “कुलमानजी अत्यन्त लचक हुनुभएको थियो। रविजी सभापति र कुलमानजी भावी प्रधानमन्त्रीको रूपमा अघि बढ्ने मोडेलमा दुवै पक्ष नजिक पुगेका थिए। तर रास्वपाभित्रैबाट बिथोल्ने काम भयो।”
उनीहरूको आरोप अनुसार रास्वपाका कार्यवाहक सभापति डीपी अर्याल एकता नचाहने मुख्य व्यक्ति बने।
“एकता भएपछि कुलमान हाबी हुने र आफू ओझेलमा पर्ने डरले डीपी अर्यालले नयाँ–नयाँ कुरा उठाएर वातावरण बिगारे,” उज्यालो पार्टी पक्षको दाबी छ।
अर्कोतर्फ, रास्वपाकै एक पदाधिकारी भन्छन्—
“कुलमानले चुनावसम्मका लागि भए पनि पार्टीको बागडोर मागे। यसमा सहमति मिल्न सकेन।”
यद्यपि, चुनावी तालमेल भने सम्भव रहेको र दुवै पक्ष यसबारे सकारात्मक रहेको बताइन्छ।
रास्वपाले उपसभापति डा. स्वर्णिम वाग्लेको नेतृत्वमा वार्ता अघि बढाएको थियो। वाग्ले सुरुबाटै कुलमानलाई उपसभापति दिन तयार थिए। तर, पार्टीको नेतृत्व नै हस्तान्तरण गर्नुपर्ने शर्तले एकता अन्ततः टुटेको बताइएको छ।
