उखुको न्यूनतम मूल्य ६२० रुपैयाँ निर्धारण, किसानलाई दिइने अनुदान रकम ७० रुपैयाँ यथावत

समाचार

गृहपृष्ठ
समाचार
उखुको न्यूनतम मूल्य ६२० रुपैयाँ निर्धारण, किसानलाई दिइने अनुदान रकम ७० रुपैयाँ यथावत

उखुको न्यूनतम मूल्य ६२० रुपैयाँ निर्धारण, किसानलाई दिइने अनुदान रकम ७० रुपैयाँ यथावत

मंगलबार, मंसिर २४, २०८२ ज्योति दैनिक

काठमाण्डौ । सरकारले उखुको न्यूनतम समर्थन मूल्य प्रतिक्विन्टल ६ सय २० रुपैयाँ निर्धारण गरेको छ । यसअघि प्रतिक्विन्टल ५ सय ८५ रुपैयाँ रहेको मूल्यमा सरकारले ३५ रुपैयाँ बढाएको हो ।

सरकारका प्रवक्ता तथा सञ्चारमन्त्री जगदीश खरेलले मन्त्रिपरिषद्को निर्णय सार्वजनिक गर्दै उखु किसानलाई प्रदान हुँदै आएको प्रतिक्विन्टल ७० रुपैयाँ अनुदान पहिलेकै अवस्थामा कायम राख्ने निर्णय गरिएको जानकारी दिनुभयो ।

कृषि तथा पशुपन्छी विकास मन्त्रालयले उखुको लागत संरचना अध्ययन गरी प्रतिक्विन्टल लागत मूल्य ४ सय ३७ रुपैयाँ, ढुवानी ८१ रुपैयाँ, र किसानको नाफा १ सय २ रुपैयाँ गणना गरी न्यूनतम समर्थन मूल्य ६ सय २० रुपैयाँ निर्धारण गर्न मंसिर १७ गते मन्त्रिपरिषद्मा सिफारिस गरेको थियो ।

गएको वर्षको अन्तिमतिर सरकारले श्रोत अभाव देखाउँदै किसानलाई दिँदै आएको ७० रुपैयाँमध्ये ३५ रुपैयाँ अनुदान कटौती गरेको थियो । सरकारको यो निर्णयप्रति किसानहरूले विरोध गर्दै पुरानै ७० रुपैयाँ अनुदान उपलब्ध गराउनुपर्ने माग गर्दै आएका थिए ।

यसपटक सरकारले किसानको माग सम्बोधन गर्दै पुरानै अनुदान रकमलाई निरन्तरता दिएको हो । सरकारले किसानलाई उपलब्ध गराउँने अनुदान रकम सीधै किसानको बैंक खातामा राख्ने गरिएको छ ।

प्रकाशित मिति: मंगलबार, मंसिर २३, २०८२ १०:०१