काठमाडौं । नेकपा एमालेका उपमहासचिव योगेश भट्टराईले टिकट विवादको बहस छाड्न पार्टी पङ्क्तिमा आह्वान गरेका छन् । आज एक भिडिओ सन्देशमार्फत उनले एमालेका उम्मेदवारलाई जिताउन लाग्न अपिल गरे ।
उनले भने, ‘मैले पार्टी केन्द्र सचिवालयको बैठकमा उम्मेदवारको छनोट सम्बन्धमा केही फरक धारणा राखेको छु । त्यो फरक मतको रूपमा पनि दर्ता गरेको छु । आज म त्यस विषयमा चर्चा गर्न चाहन्नँ । किनकि त्यसको अध्याय समाप्त भइसकेको छ ।’
फागुन २१ पछि एमालेले सरकार बनाउने र एमालेको नेतृत्वमा सशक्त ढङ्गले अगाडि बढ्ने उनको विश्वास छ ।
उनले भने, ‘मैले पार्टी अध्यक्षलाई भनेको छु समीक्षा हुनुपर्छ । हामीले उम्मेदवार छनोट गर्दा न्यायसङ्गत ढङ्गले गर्यौँ कि गरेनौँ ? मापदण्डहरू बनायौँ कि बनाएनौँ ? जित्ने लोकप्रिय, पार्टी प्रति निष्ठावान उम्मेदवार दियौँ कि दिएनौँ ? यसको समीक्षा निर्वाचन पछि गरौँला । तर, यति बेला अब हाम्रो अगाडि दायाँबायाँ केही पनि छैन। हाम्रो अगाडि अब सूर्य चिन्ह मात्रै छ ।’
पार्टीभित्र फरक मत हुने कुरालाई स्वाभाविक रूपमा लिनुपर्ने बताए ।
उनले थपेका छन्, ‘पार्टीमा भिन्न मतहरू हुन्छन् । त्यसलाई सम्मान गर्नुपर्छ । तर, ती फरक मत, भिन्न मतहरूले अरू पार्टी सँगको प्रतिस्पर्धामा नेकपा एमालेलाई कमजोर बनाउनु हुँदैन, घाटा गर्नु हुँदैन । देशभरिका साथीहरूलाई कसले उम्मेदवारीको टिकट पाउनुभयो, कसले पाउनुभएन, अब यो बहसलाई बन्द गरौँ ।’
भट्टराईले १६५ निर्वाचन क्षेत्रमध्ये केही क्षेत्रमा अहिले पनि उम्मेदवारलाई मिलाउन सकिने भए मिलाउन अध्यक्ष ओलीलाई आग्रह गरेका छन् ।
उनले थपेका छन्, ‘मैले मेरो लागि मागेको छैन । म स्पष्ट भइसकेँ म ताप्लेजुङबाट उम्मेदवार हुन इच्छुक थिएँ । तर पार्टी अध्यक्षले सार्वजनिक ढङ्गले निर्णय गरेर पठाइसकेपछि अब म त्यसमा कुनै किचलो गर्ने वाला छैन ।’
उनले महाधिवेशनमा आफूलाई सहयोग गर्यो कि गरेन भन्दा पनि फराकिलो छाती राखेर उम्मेदवारबारे पुनर्विचार गर्न अध्यक्ष ओलीलाई आग्रह गरे ।
-1768802123.jpg)
