वीरगञ्ज । पर्सा जिल्लामा ग्यास, डिजेल र पेट्रोलको अभाव नरहेको र कृत्रिम अभाव सिर्जना नगर्न जिल्ला प्रशासन कार्यालय पर्साले सरोकारवालाहरुलाई चेतावनी दिएको छ ।
आज पर्साका निमित्त प्रमुख जिल्ला अधिकारी विनोद कुमार पोखरेलको अध्यक्षतामा बसेको बैठकले पेट्रोलियम पदार्थको आपूर्ति र वितरणलाई नियमित तथा व्यवस्थित बनाउन विभिन्न निर्णय गरेको हो ।
बैठकमा नेपाल आयल निगम, ग्यास उद्योग, डिलर तथा सरोकारवाला संघ–संस्थाका प्रतिनिधिहरुको सहभागिता रहेको थियो ।
बैठकमा प्रस्तुत विवरण अनुसार पर्सा जिल्लामा हाल ग्यास, डिजेल र पेट्रोलको मौज्दात पर्याप्त रहेको र आयात पनि नियमित रुपमा भइरहेको जानकारी दिइएको छ ।
यस कारण जिल्लामा खाना पकाउने ग्यास तथा पेट्रोलियम पदार्थको अभाव हुने कुनै सम्भावना नरहेको प्रशासनले जनाएको छ ।
प्रशासनले अनावश्यक रुपमा ग्यास, डिजेल र पेट्रोल जम्मा नगर्न र कृत्रिम अभावको हल्ला नफैलाउन समेत आग्रह गरेको छ ।
साथै पेट्रोल र डिजेलको खुला बिक्री–वितरण (ग्यालेन, ड्रम आदि) नगर्न सम्बन्धित निकायहरुलाई निर्देशन दिइएको छ ।
यसैगरी ग्यास डिलरहरुले दैनिक रुपमा बिक्री–वितरण गरेको उपभोक्ताको नाम, ठेगाना र सम्पर्क नम्बर सहितको विवरण ग्यास उद्योगमा उपलब्ध गराउने र ग्यास उद्योगहरुले आफ्ना डिलरहरुलाई बिक्री गरेको सिलिन्डरको परिमाणसहितको विवरण जिल्ला प्रशासन कार्यालय पर्सा, वाणिज्य आपूर्ति तथा उपभोक्ता संरक्षण कार्यालय वीरगञ्ज र नेपाल आयल निगम शाखा कार्यालयलाई इमेलमार्फत अनिवार्य रुपमा जानकारी गराउने निर्णय समेत गरिएको छ ।
-1747146968.jpg)
