साइकल यात्रुलाई मुक्का हानेर बेहोस अवस्थामै सडकमा घिसार्ने भेटवाल पक्राउ

समाचार

गृहपृष्ठ
समाचार
साइकल यात्रुलाई मुक्का हानेर बेहोस अवस्थामै सडकमा घिसार्ने भेटवाल पक्राउ

साइकल यात्रुलाई मुक्का हानेर बेहोस अवस्थामै सडकमा घिसार्ने भेटवाल पक्राउ

मंगलबार, असार २६, २०८० ज्योति दैनिक

विराटनगर । विराटनगर महानगरपालिका ४ स्थित दूधफारम चोकनजिकै एक साइकल यात्रीलाई मुक्का हानेर सडकमा लडाएपछि घिसार्दै गरेको भडियोमा देखिएका व्यक्ति पक्राउ परेका छन् । साइकल यात्रीलाई मुक्का हानेर लडाएको भिडियो भाइरल बनेपछि मोरङ प्रहरीले उनको खोजी तीव्र बनाएको थियो ।

प्रहरीले दिएको जानकारीअनुसार असार १९ गते राति कोसी राजमार्गमा निजी गाडीबाट ओर्लिएर विराटनगर ४ का १९ वर्षीया आयुष भेटवालले साइकल यात्रुलाई मुक्का हानेर ढलाएका थिए । त्यसपछि बेहोस भएका साइकल यात्री विराटनगर–६ बस्ने पवन साहलाई अमानवीय ढंगले सडकमा घिसारेर पल्लो छेउ पुर्याएका थिए । भेटवालले साइकल यात्रीलाई बेहोस अवस्थामै अमानवीय ढंगले घिसारेको भिडियो भाइरल बनेको छ ।

विराटनगर–४ खारजी बस्ने भेटवाललाई घटना भएको १० घण्टापछि पक्राउ गरिएको र अदालतबाट म्याद थप गरी ज्यान मार्ने उद्योग कसुरमा अनुसन्धान भइरहेको जिल्ला प्रहरी कार्यालय मोरङका एसपी दिपक पोखरेलले जानकारी दिए ।

पीडित साहले आफू फ्याक्ट्रीमा काम गरेर साथीसँगै साइकलमा घर फर्कने क्रममा भेटवालले निजी गाडीबाट एक्कासी उत्रिएर मुक्का हानेर बेहोस बनाएको बताए ।

“म आफ्नै सुरमा साइकलमा फर्कँदै थिएँ, नजिकै दौडिएर आई एक्कासी मुक्का प्रहार भएपछि म बेहोस भएर सडकमा पछारिएँ,” साहले भने, “अनाहकमा ज्यान मार्ने गरी आक्रमण भयो । मेरो उनीसँग कुनै दुश्मनी पनि थिएन । मलाई ज्यान मार्न खोज्नेलाई ज्यान मुद्दामा कारबाही हुनुपर्छ ।”

बा१५च ३४४५ नम्बरको कारमा सवार भेटवालले साहमाथि आक्रमण गरेको र उनका मतियारहरुको समेत खोजी भइरहेको प्रहरीले जनाएको छ ।

प्रकाशित मिति: मंगलबार, असार २६, २०८० २१:३७