बिरगंज । भारतसँग सिमाना जोडिएका सुदूरपश्चिमका नाकाहरू हुँदै नेपाल फर्किने व्यक्तिहरूमा कोभिड–१९ संक्रमणको जोखिम अझै कायम देखिएको छ।
बर्दियाबाट भारतको हल्द्वानी गएका एक नेपाली नागरिक बुधबार गड्डाचौकी सीमानाका हुँदै नेपाल फर्किएपछि कोरोना संक्रमण पुष्टि भएको छ। संक्रमितको अवस्था गम्भीर भएपछि उनलाई महाकाली प्रादेशिक अस्पताल, महेन्द्रनगरको आइसोलेसन कक्षमा भर्ना गरिएको छ। सिमानामा खटिएको हेल्थ डेस्कले गरेको एन्टिजेन परीक्षणमा उनको रिपोर्ट पोजेटिभ आएको हो।
सुदूरपश्चिम प्रदेशको प्रादेशिक आपतकालीन कार्य सञ्चालन केन्द्रका सूचना अधिकारी हेमराज जोशीका अनुसार ती बिरामीमा उच्च ज्वरो, रुघाखोकी र सास फेर्न समस्या देखिएको थियो। "परीक्षणपछि कोरोना पोजेटिभ पुष्टि भएकाले अस्पतालमा उपचार भइरहेको छ," उनले जानकारी दिए। सोही दिन परीक्षण गरिएका पाँचमध्ये एक जनामा मात्र संक्रमण पुष्टि भएको हो।
महाकाली प्रादेशिक अस्पतालका मेडिकल सुपरिटेन्डेन्ट डा. अर्जुन भट्टले संक्रमित बिरामीको स्वास्थ्यमा सामान्य सुधार देखिएको जानकारी दिए। कोभिड संक्रमणका कारण आइसोलेसनमा राखिएको यो पहिलो बिरामी भएको उनको भनाइ छ।
हाल भारतबाट फर्कने व्यक्तिहरूमा पुनः संक्रमण देखिन थालेपछि स्वास्थ्य मापदण्ड पालना गर्न विशेषज्ञहरूले सुझाव दिएका छन्। डा. भट्टका अनुसार मास्क प्रयोग, स्यानिटाइजरको प्रयोग र सामाजिक दूरी कायम राख्न जरुरी छ। संक्रमितलाई होम आइसोलेसन वा क्वारेन्टिनमा इमान्दारीपूर्वक बस्न आग्रह गरिएको छ।
भारतसँग सिमाना जोडिएका कञ्चनपुरको गड्डाचौकी, कैलालीको गौरीफन्टा र खकरौला, बैतडीको झुलाघाट तथा दार्चुलाको पुलघाटमा स्थापना गरिएको हेल्थ डेस्कमार्फत शंकास्पद व्यक्तिहरूको स्वास्थ्य परीक्षण भइरहेको छ।
गत जेठ २१ देखि असार ४ गतेसम्म सीमानाका हुँदै फर्किएका २३ जनामा कोरोना पुष्टि भएको छ। तीमध्ये १६ जना संक्रमण मुक्त भइसकेका छन् भने बाँकी सात जना होम आइसोलेसनमा रहँदै उपचार गरिरहेका छन्।
