,वीरगञ्ज । जगरनाथपुर गाउँपालिकाले आगामी आर्थिक वर्ष २०८२/८३ का लागि ४५ करोड ४१ लाख १७ हजार ११ रुपैयाँको अनुमानित बजेट सार्वजनिक गरेको छ। सोमबार जगरनाथपुर–४ सन्ठीस्थित विद्यालय प्रांगणमा आयोजित गाउँपालिकाको १३औं गाउँसभाको अधिवेशनमा गाउँपालिका अध्यक्ष श्रीकान्त प्रसाद यादवले यो बजेट प्रस्तुत गरेका हुन्। उनले बजेट प्रस्तुत गर्नुअघि आगामी आर्थिक वर्षका लागि नीति तथा कार्यक्रम पनि सार्वजनिक गरेका थिए।
बजेटका मुख्य स्रोत र विनियोजन
गाउँपालिकाको आगामी आर्थिक वर्षको बजेटलाई विभिन्न स्रोतबाट जुटाइनेछ। यसमा संघीय समानीकरण अनुदानबाट १० करोड ५६ लाख, संघीय सशर्त अनुदानबाट १८ करोड ३ लाख, संघीय विशेष अनुदानबाट २ करोड ८९ लाख, र संघीय राजस्व बाँडफाँटबाट ८ करोड ८२ लाख २८ हजार रुपैयाँ प्राप्त हुने अनुमान गरिएको छ। यस्तै, प्रदेश समानीकरण अनुदानबाट ७३ लाख ४१ हजार, प्रदेश सशर्त अनुदानबाट ८० लाख, प्रदेश विशेष अनुदानबाट ३० लाख, प्रदेश समपूरक अनुदानबाट २० लाख, र प्रदेश राजस्व बाँडफाँटबाट ८० लाख रुपैयाँ परिचालन गरिनेछ। गाउँपालिकाको आन्तरिक स्रोत तथा बैंक मौज्दात २ करोड ५५ लाख रुपैयाँ रहेको छ।
बजेट विनियोजनमा विभिन्न क्षेत्रलाई प्राथमिकता दिइएको छ। गाउँपालिका अध्यक्ष यादवका अनुसार, कृषितर्फ ७५ लाख रुपैयाँ, शिक्षातर्फ १ करोड ६३ लाख ४७ हजार रुपैयाँ, पशु सेवातर्फ १० लाख ५० हजार रुपैयाँ, स्वास्थ्यतर्फ १ करोड ६० लाख ५८ हजार रुपैयाँ, र सामाजिक विकासतर्फ १ करोड रुपैयाँ विनियोजन गरिएको छ। यसबाहेक, गाउँपालिकाको कार्यालय सञ्चालन तथा चालु खर्चतर्फ १० करोड ५८ लाख रुपैयाँ र वडा कार्यालयमार्फत सञ्चालन हुने बजेट ३ करोड रुपैयाँ छुट्याइएको छ।
सांसद रिजालको विकास र सेवामा जोड
गाउँसभालाई प्रमुख अतिथिका रूपमा सम्बोधन गर्दै पूर्व उद्योगमन्त्री तथा पर्सा–४ का सांसद रमेश रिजालले पालिकाका जनप्रतिनिधिहरूलाई शिक्षा र स्वास्थ्यजस्ता आधारभूत सेवामा कुनै कमी नगर्न अनुरोध गरे। उनले विकास र जनताको सेवाका सवालमा राजनीति नगर्न पनि सचेत गराए।
गाउँपालिका अध्यक्ष यादवको अध्यक्षतामा तथा सांसद रिजालको प्रमुख आतिथ्यतामा भएको गाउँसभा अधिवेशनमा गाउँपालिका उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश यादव, पाँचवटै वडाका वडाध्यक्ष, कार्यपालिका सदस्य, वडासदस्य, कर्मचारी लगायतको सहभागिता रहेको थियो।
