बलिउड अभिनेत्री ज्याकलिन फर्नान्डेज विरुद्धको सम्पत्ति शुद्धिकरण मुद्दामा ईडीको अनुसन्धान र कारबाही जारी रहने भएको छ ।
दिल्ली उच्च अदालतले बिहीबार ईडीको एफआईआर रद्द गर्न माग गर्दै अभिनेत्रीले हालेको निवेदन खारेज गरेको छ । ईडीले ठग सुकेश चन्द्रशेखरसँग सम्बन्धित २०० करोड रुपैयाँको मनी लान्ड्रिङ मुद्दामा एफआईआर दर्ता गरेको छ । यो मुद्दामा ज्याकलिन पनि अभियुक्त हुन् ।
तिहाड जेलमा रहँदा सुकेशले र्यानब्याक्सीका पूर्व प्रमोटर शिविंदर सिंह र मालविंदर सिंहलाई जेलबाट निकाल्ने वाचा गरेर २०० करोडभन्दा बढी ठगेका थिए । उनी आफूलाई कहिले प्रधानमन्त्री कार्यालय र कहिले गृह मन्त्रालयको अधिकारीको रूपमा परिचय गराउँथे । तिहाड जेलका धेरै अधिकारीहरू समेत उनको यस ठगीमा संलग्न थिए । सुकेशले ती सबैलाई ठुलो रकम दिने गर्थे।
यसपछि, प्रवर्तन निर्देशनालय (ईडी)ले सुकेश विरुद्ध मनी लान्ड्रिङको मुद्दा दर्ता गर्यो । सुकेशकी श्रीमती लीना पल पनि यस मुद्दामा अभियुक्त हुन् । उनीमाथि चेन्नईस्थित कम्पनी मार्फत पैसा स्थानान्तरण गरेको आरोप छ ।
चन्द्रशेखर र लीनालाई दिल्ली प्रहरीले ईडीको मनी लान्ड्रिङ मुद्दामा पक्राउ गरेको थियो । प्रहरीले यस मुद्दामा महाराष्ट्र संगठित अपराध नियन्त्रण ऐन लगाएको छ ।
सुकेशको मुद्दामा मुछिइन् ज्याकलिन
ईडीका अनुसार सुकेश र ज्याकलिनबीच जनवरी २०२१ मा कुराकानी सुरु भएको थियो । तिहाड जेलमा हुँदा पनि सुकेश ज्याकलिनसँग फोनमा कुरा गर्थे । सुकेशले ज्याकलिनलाई करोडौं रुपैयाँको उपहार दिएको ईडीले आफ्नो आरोपपत्रमा बताएको छ । यसमा ५२ लाख भारु पर्ने अरबी घोडा, ९ लाख भारुको ३ पर्शियन बिरालो, हीरा सेट जस्ता महँगा उपहारहरू छन् ।
सुकेशले ज्याकलिनको लागि चार्टर्ड फ्लाइटहरू पनि बुक गरेका थिए । उनले अभिनेत्रीलाई सुन, हीराका गहना, आयातित क्रोकरी पनि दिएका थिए । यसबाहेक, सुकेशले ज्याकलिनको भाइसँग पनि लेनदेन गरेका छन् । सुकेशले ज्याकलिनसँग सम्बन्धमा रहेको पनि दाबी गरेका थिए । २०१० मा सुकेशले मोडेल तथा अभिनेत्री लीना पललाई भेटे ।
लीनाले मद्रास क्याफे फिल्ममा काम गरेकी छिन् । उनीहरूको मित्रता बिस्तारै बढ्दै गयो र दुवै सँगै बस्न थाले । यहीँबाट सुकेश बलिउडमा प्रवेश गरे । अब लीनाले पनि सुकेशलाई मानिसहरूलाई ठग्न मद्दत गर्न थालिन् । दुवैले २०१५ मा विवाह गरे । विवाहपछि पनि धेरै बलिउड अभिनेत्रीहरूसँग सुकेशको सम्बन्धको चर्चा सुन्नमा आएको थियो । यिनै मध्ये एक ज्याकलिन थिइन् ।
