काठमाण्डाै । नेपालले भैँसीको मासु, दुग्ध पदार्थ, तरकारी/फलफूल र जडीबुटी चीन निर्यातका लागि भन्सार प्रशासनमा सहजीकरण र थप लचकता अपनाउन चीनसँग आग्रह गरेको छ ।
चीनको भन्सार प्रशासन र कृषि तथा पशुपक्षी विकास मन्त्रालयका उच्च अधिकारीबीच काठमाण्डौमा भएको द्विपक्षीय बैठकमा नेपालले गरेको आग्रहलाई चिनियाँ पक्षले सकारात्मक रूपमा लिएको छ ।
बैठकमा नेपालको नेतृत्व कृषि तथा पशुपक्षी विकासमन्त्री रामनाथ अधिकारीले गर्नुभएको थियो भने चीनको भन्सार प्रशासनका उपमन्त्री वाङ्ग लिङजुनले चिनियाँ पक्षको नेतृत्व गर्नुभएको थियो ।
नेपालबाट थर्मल रूपमा भैँसीको प्रशोधित मासु र भैँसीको कार्टिलेज (कुरकुरे हाड) निर्यातसँगै दुग्ध पदार्थ विशेषगरी घ्यु, नौनी, मक्खन तथा छुर्पी चीन निर्यातका लागि कृषि मन्त्रालयले जोड गरिरहेको छ । त्यस्तै हेलेज साइलेज पशु आहारा निर्यातका लागि पनि द्विपक्षीय बैठकमा नेपालले कुरा राखेको छ ।
नेपालले कुखुराको मासु र पन्जा, तरकारी, सुन्तलाजन्य फलफूल, चिया तथा कफी र जडीबुटी निर्यातका लागि सक्षम रहेको र यसका लागि थप सहजीकरण गरिदिन पनि आग्रह गरेको छ । अहिले नेपालबाट ३४ प्रकारका कृषि वस्तु ६१ वटा कम्पनीमार्फत निर्यात हुँदै आएको छ । त्यस्तै हरियो घाँस हेलेज ५ वटा कम्पनीमार्फत चीन निर्यात हुँदै आएको छ ।
नेपालले पशु आहार साइलेज निर्यातका लागि पनि चीनसँग प्रस्ताव गरेको छ ।
बैठकमा चीनका भन्सार प्रशासनका उपमन्त्री वाङ्गले चीनले नेपालबाट कृषि वस्तु निर्यातको विषयलाई उच्च महत्त्व दिएको बताउनुभयो । बैठकमा कृषिमन्त्री अधिकारीले नेपालबाट मासु निर्यातका लागि आधारभूत शर्त खोरेतमुक्त क्षेत्र घोषणा गर्नेलगायतका प्रक्रियादेखि चीनको क्वारेन्टीन मापदण्ड पूरा गर्नका लागि प्रयास भइरहेको जानकारी गराउनुभयो ।
