वीरगञ्ज । पूर्व राष्ट्रपति विद्यादेवी भण्डारी आज वीरगञ्ज आइपुगेकी छन्। वीरगञ्ज उद्योग वाणिज्य संघको आयोजनामा भइरहेको ‘वृहत महिला सम्मेलन–२०८२’ मा सहभागी हुन उनी यहाँ आएकी हुन् । भण्डारीलाई २० किलोको माला लगाएर भव्य स्वागत गरिएको छ।
भण्डारीको स्वागतका लागि एमालेका स्थायी कमिटी सदस्य मुकुन्द न्यौपाने, पोलिटब्युरो सदस्य पुरुषोत्तम पौडेल, केन्द्रीय सदस्य केदार न्यौपाने, अरबिन्द्र सिंह, प्रदेश सचिव मनोज पौडेल, सचिवालय सदस्य जय प्रकाश थारु, जितपुर सिमरा उपमेयर भोला अधिकारी, अध्यक्ष त्रिलोक शाह र वीरगंज महानगर अध्यक्ष नवराज शर्मा लगायतका नेताहरु सिमरा पुगेका थिए।
उनले सम्मेलनलाई सम्बोधन गर्ने कार्यक्रम रहेको आयोजकले जनाएका छन्। संघका अध्यक्ष हरिप्रसाद गौतमले बारा–पर्सामा लुकेर रहेका महिला प्रतिभालाई पहिचान गर्ने उद्देश्यले सम्मेलन आयोजना गरिएको बताए। ‘नारी : शक्ति, समर्पण र सम्मान’ विषयमा कार्यशाला गोष्ठीसमेत हुने यस कार्यक्रममा पूर्व राष्ट्रपति भण्डारी प्रमुख अतिथि रहनेछन्।
महिला उद्यमशीलता विकास समितिकी संयोजक डा. लक्ष्मी थापाले पर्सा–बारा जिल्लामा उद्योग, व्यापार, शिक्षा, स्वास्थ्य र सामाजिक सेवा क्षेत्रमा सक्रिय महिलाको योगदानलाई उजागर गर्दै उनीहरूको नेतृत्व क्षमता अभिवृद्धि गर्ने लक्ष्य सम्मेलनले लिएको बताइन्। सहसंयोजक अनुप अग्रवालका अनुसार कार्यक्रम सात चरणमा सम्पन्न हुनेछ। जसअन्तर्गत प्यानल छलफल, मोटिभेशनल वर्कशप र ३०–४० उत्कृष्ट महिलालाई सम्मान गर्ने योजना छ।
यसैबीच, पूर्व राष्ट्रपति भण्डारीको सहभागिताले नेकपा एमालेभित्र चर्चा चर्काएको छ। पार्टी नेतृत्वले उनलाई कुनै औपचारिक कार्यक्रममा सहभागी नगराउने निर्देशन दिँदै आए पनि नेता–कार्यकर्ताहरु भने उनको पक्षमा सक्रिय देखिएका छन्। एमाले पर्साका सचिव महेश दासले पार्टीले भदौ १४ मा कुनै कार्यक्रम नगरेको भन्दै सामाजिक सञ्जालमार्फत प्रष्ट पारेका छन्।
तर एमालेका पोलिटब्युरो सदस्य तथा पूर्वमन्त्री पुरुषोत्तम पौडेलले भण्डारीलाई ‘गणतन्त्रको गौरव’ भन्दै स्वागत र सम्मान गर्नु सबैको कर्तव्य रहेको बताएका छन्। पौडेलका अनुसार भण्डारीले एमालेको नेतृत्वमा रहँदा र दुई पटक राष्ट्रपतिका रूपमा नेपालको समावेशिता र महिला सहभागितामा ऐतिहासिक भूमिका निर्वाह गरेकी छन् ।
पार्टीको निर्देशन विपरीत सीमरा विमानस्थलमा पूर्व राष्ट्रपति विद्यादेवी भण्डारीको स्वागत गर्न ठूलो संख्यामा एमालेका नेता–कार्यकर्ताहरू पुगेका छन्। पार्टीले सहभागी नहुन भने पनि कार्यकर्ताहरूको उल्लेख्य उपस्थिति देखिएको छ।
भण्डारीलाई स्वागत गर्न एमालेका केन्द्रीयदेखि स्थानीय तहका नेता–कार्यकर्ताहरु सिमरा विमानस्थल पुगेका छन् । यस घटनाक्रमले एमाले पर्साभित्र आन्तरिक गुटबन्दी र असन्तुष्टि झनै सतहमा आएको टिप्पणी गरिएको छ।
