जनकपुरधाम l मधेस प्रदेशमा सत्ता सञ्चालन गरिरहेको गठबन्धन सरकार अहिले आन्तरिक विवाद र राजनीतिक खिचातानीका कारण गम्भीर संकटतर्फ उन्मुख भएको छ। विशेषगरी जनमत पार्टीभित्र देखिएको विभाजनले सरकारको स्थायित्वमाथि प्रश्नचिन्ह खडा गरेको हो।
केही दिनअघि जनमत पार्टीका केही सांसदहरूले सरकारलाई दिएको समर्थन फिर्ता लिएको घोषणा गरे पनि उक्त निर्णय पार्टीभित्रै विवादको विषय बनेको छ। प्रमुख सचेतक चन्दन कुमार सिंहको नेतृत्वमा गरिएको निर्णयप्रति संसदीय दलका नेता महेश प्रसाद यादवले असहमति जनाएका छन्। उनले प्रक्रिया र अधिकारको विषय उठाउँदै यस्तो निर्णय पार्टी विधानविपरीत भएको दाबी गरेका छन्।
यता, पार्टी अध्यक्ष डा. सीके राउतले अचानक संसदीय दलको नेतृत्व परिवर्तन गर्दै सिंहलाई नयाँ नेता बनाएका छन्। यस कदमले विवाद झन् चर्किएको छ र पार्टीभित्र शक्ति संघर्ष स्पष्ट देखिएको छ।
मुख्यमन्त्री कृष्ण प्रसाद यादवले भने औपचारिक प्रक्रिया पूरा नभएसम्म समर्थन फिर्तालाई मान्यता दिन नसकिने अडान लिएका छन्। उनका अनुसार केवल सार्वजनिक घोषणाले मात्र सरकारको हैसियतमा असर पार्दैन।
प्रमुख प्रतिपक्ष नेकपा एमालेले भने यस अवस्थालाई सरकारको कमजोरीको रूपमा व्याख्या गरेको छ। एमालेका नेता सरोज कुमार यादवले गठबन्धनभित्रै असन्तुष्टि चुलिँदा सरकार प्रभावहीन बन्दै गएको टिप्पणी गरेका छन्।
यसबीच, गठबन्धनका अन्य दलहरू पनि ‘पर्ख र हेर’ को अवस्थामा छन्। जनता समाजवादी पार्टी नेपालले आफ्नो धारणा तय गर्न आन्तरिक छलफल तीव्र पारेको छ भने अन्य दलहरूको निर्णय पनि चाँडै सार्वजनिक हुने अपेक्षा गरिएको छ।
पाँच महिना नपुग्दै सरकार अस्थिरताको संघारमा पुग्नुले जनतामा निराशा बढाउने संकेत देखिएको छ। राजनीतिक दलहरूबीचको समन्वय अभाव र आन्तरिक विवादले मधेस प्रदेशमा पुनः सत्ता समीकरण बदलिन सक्ने आँकलन गरिएको छ।
