वीरगंज । नेपाल पत्रकार महासंघ (FNJ) पर्सा जिल्ला शाखाले वीरगंज महानगरपालिकाप्रति गम्भीर असन्तुष्टि व्यक्त गर्दै तत्काल आफ्ना मागहरू सम्बोधन गर्न माग गरेको छ। महासंघका जिल्ला सचिव विजयकुमार महतोद्वारा हस्ताक्षरित एक प्रेस विज्ञप्ति जारी गर्दै महानगरपालिकाले पत्रकार र स्थानीय सञ्चारमाध्यमहरूलाई उपेक्षा गरेको आरोप लगाइएको छ।
विज्ञप्तिमा पर्सा जिल्लामा लामो समयदेखि पत्रकारिता तथा सामाजिक रूपान्तरणमा महत्त्वपूर्ण योगदान पुर्याउँदै आएका साप्ताहिक पत्रपत्रिकाहरूलाई लोककल्याणकारी सूचना लगायतका सेवा-सुविधाबाट वञ्चित गरिएको उल्लेख छ। महानगरको यस्तो निर्णय विभेदकारी, असमान र प्रेस मैत्री वातावरण विपरीत रहेको ठहर महासंघले गरेको छ। सञ्चारमाध्यमहरूबीच गरिने यस्तो असमान व्यवहार तत्काल अन्त्य हुनुपर्ने माग विज्ञप्तिमा जोडदार रूपमा उठाइएको छ।
कानुन बने पनि ज्येष्ठ पत्रकार पेन्सन योजना अलपत्र
महानगरपालिकाले आफैंले निर्माण गरेको कानुनमा ज्येष्ठ पत्रकारहरूका लागि पेन्सन र सामाजिक सुरक्षाको व्यवस्था गरेको भए तापनि हालसम्म त्यसको कार्यान्वयन प्रक्रिया समेत प्रारम्भ हुन नसकेकोमा महासंघले आपत्ति जनाएको छ। कानुन निर्माण गरेर पनि त्यसको कार्यान्वयन नगर्नु स्वयं कानुनको उद्देश्यप्रतिको उपेक्षा भएको महासंघको ठहर छ।
सञ्चारमाध्यमको बक्यौता रकम रोकियो
विज्ञप्तिका अनुसार महानगरपालिकाले विभिन्न समयमा प्रकाशन तथा प्रसारणका लागि उपलब्ध गराएका सूचनाबापत सञ्चारमाध्यमहरूलाई भुक्तानी गर्नुपर्ने रकमसमेत कतिपयको वि.सं. २०८० सालदेखि रोकेर राखिएको छ। वर्षौंसम्म भुक्तानी नहुँदा स्थानीय सञ्चार संस्थाहरू आर्थिक रूपमा ठूलो मारमा परेका छन् भने पत्रकारिता पेसा सञ्चालनमा समेत प्रतिकूल प्रभाव परेको छ।
नेपाल पत्रकार महासंघ पर्साका ५ बुँदे मागहरू:
सञ्चार क्षेत्रको विकास, पत्रकारिताको सम्मान तथा कानुनी व्यवस्थाको प्रभावकारी कार्यान्वयनका लागि महासंघले वीरगंज महानगरपालिकासमक्ष निम्न मागहरू तत्काल सम्बोधन गर्न आग्रह गरेको छ:
१. आर्थिक वर्ष २०८२/८३ का लागि विनियोजन गरिएको लोककल्याणकारी सूचना तत्काल प्रदान गरी भुक्तानीको व्यवस्था मिलाइयोस्।
२. साप्ताहिक पत्रपत्रिकालाई सुविधा तथा अवसरबाट वञ्चित गर्ने विभेदकारी निर्णय अविलम्ब खारेज गरियोस्।
३. नेपाल पत्रकार महासंघ पर्साको संस्थागत विकासका लागि विनियोजन गरिएको बजेट तत्काल उपलब्ध गराइयोस्।
४. स्थानीय आमसञ्चार प्रवर्द्धनसम्बन्धी कानुनमा व्यवस्था गरिएको ज्येष्ठ पत्रकार पेन्सन कार्यक्रम तत्काल कार्यान्वयन गरियोस्।
५. सञ्चारमाध्यमहरूलाई भुक्तानी गर्न बाँकी रहेका सम्पूर्ण रकम अविलम्ब निकासा गरियोस्।
पत्रकारिता क्षेत्रको सुदृढीकरण, प्रेस स्वतन्त्रताको संरक्षण तथा स्थानीय सञ्चारमाध्यमको अस्तित्व र विकासका लागि यी उल्लेखित मागहरू यथाशीघ्र सम्बोधन हुनेमा नेपाल पत्रकार महासंघ पर्साले विश्वास लिएको छ। मागहरू पूरा नभएमा महासंघ थप संघर्षका कार्यक्रमहरू अगाडि बढाउन बाध्य हुने संकेत समेत विज्ञप्ति मार्फत दिइएको छ।
