सप्तरीमा पानीमा डुबेर ७२ वर्षीया वृद्धाको मृत्यु

समाचार

गृहपृष्ठ
समाचार
सप्तरीमा पानीमा डुबेर ७२ वर्षीया वृद्धाको मृत्यु

सप्तरीमा पानीमा डुबेर ७२ वर्षीया वृद्धाको मृत्यु

सोमबार, भदौ २, २०८२ ज्योति दैनिक

सप्तरी । सप्तरीको अग्निसाइर कृष्णासवरन गाउँपालिका–२ चाँदनी चौकमा पानीमा डुबेर एक वृद्ध महिलाको मृत्यु भएको छ ।

स्थानीय सीतापुर गाउँकी ७२ वर्षीया सजनी सदा खेतमा खनेको खाल्डोमा डुबेर मृत फेला परेकी हुन् । जर्मन पोखरी नजिकै पश्चिमतर्फ राजेन्द्र साहको खेतमा खनेको खाल्डोमा जमेको पानीमा उनी डुबेको प्रहरीले जनाएको छ ।

इलाका प्रहरी कार्यालय कञ्चनपुरका प्रमुख प्रहरी नायब उपरीक्षक माधवप्रसाद काफ्ले नेतृत्वको टोली घटनास्थल पुग्दा सदा पानीमा डुबेको अवस्थामा मृत फेला परेकी थिइन् ।

स्थानीय वडाध्यक्ष पशुपतिप्रसाद चौधरीका अनुसार मृतक सदा प्रायः जर्मन पोखरी र नजिकै रहेका खेतका खाल्डाखुल्डीमा घोङ्गी टिप्ने गर्थिन् । सोही क्रममा पानीमा डुबेर उनको मृत्यु भएको हुन सक्ने अनुमान गरिएको छ ।

प्रहरीका अनुसार कानुनी प्रक्रिया पूरा गरी मृतकको शव परीक्षणका लागि राजविराजस्थित गजेन्द्रनारायण सिंह अस्पताल पठाइएको छ । घटनाबारे थप अनुसन्धान भइरहेको छ ।

प्रकाशित मिति: सोमबार, भदौ २, २०८२ १३:०९